Türkiyənin Kayseri şəhərində Türk dünyasının müxtəlif ölkələrindən 48 şairin iştirakı ilə Beynəlxalq ədəbi toplantı keçirilib.
1xeber.media AZƏRTAC-a istinadla xəbər verir ki, Türk Ədəbiyyatı Fondu və Türkiyə Əməkdaşlıq və Koordinasiya Agentliyinin (TİKA) birgə təşkilatçılığı ilə Kayserinin Talas rayonunda baş tutan dördgünlük tədbir çərçivəsində poeziya gecələri, panel müzakirələri, təhsil müəssisələrində görüşlər təşkil olunub.
Azərbaycan, Türkiyə, Özbəkistan, Qazaxıstan, Qırğızıstan, Şimali Kipr Türk Respublikası və digər ölkələrdən gəlmiş şairlərin səsləndirdiyi poetik nümunələr türk milli düşüncəsinin ortaq səsinə çevrilib.
Azərbaycan nümayəndələrinin çıxışları Beynəlxalq ədəbi toplantıda böyük maraq doğurub.
Azərbaycan, Türkiyə və Özbəkistan Yazıçılar birliklərinin üzvü, Türk Dünyası Qadın Şairlər Birliyinin sədri, professor Xuraman Muradovanın səhnə çıxışı tədbirin yaddaqalan anlarından biri olub. Şair “Məzlumun duası” adlı şeirini səsləndirərək dünyada yaşanan humanitar faciələrin ağrısını poetik dildə ifadə edib.
Tədbirdə Azərbaycanı Xuraman Muradova ilə yanaşı, Aysel Xanlarqızı, Faiq Balabəyli, Fərid Hüseyn, Ofeliya Babayeva, Abuzər Bağırov və Pərvin Nurəliyeva təmsil ediblər. Onlar da poetik çıxışları ilə yadda qalıb.
Talas Bələdiyyəsinin sədri, Türk Dünyası Bələdiyyələr Birliyinin İdarə Heyətinin üzvü Mustafa Yalçın Bəxtiyar Vahabzadə, Anar, Çingiz Aytmatov, Nəcib Fazıl və Çingiz Dağcıya həsr olunmuş panellərin moderatorluğunu həyata keçirib.
Mədəni proqram çərçivəsində məktəblərdə və kolleclərdə görüşlər də təşkil olunub.
