1xeber.media xəbər verir ki, “Financial Times” (FT) mənbələrə istinadən yazır ki, Ukraynadakı münaqişənin həlli üçün təklif olunan planın bir hissəsi olaraq, ABŞ Kiyevdən Donbası tərk etməyi və rus dilini tanımağı tələb edəcək.
"Sülh planı rus dilinin Ukraynada rəsmi dövlət dili kimi tanınmasını nəzərdə tutur. O, həmçinin Rus Pravoslav Kilsəsinin yerli bölməsinə rəsmi statusun verilməsini nəzərdə tutur", - qəzet qeyd edib.
Bundan başqa, ABŞ-ın Ukrayna Silahlı Qüvvələrinə hərbi yardımı azaltmalı və qoşunların azaldılması prosesinə başlamalı olacağı gözlənilir. Qəzet həmçinin ukraynalı mənbəyə istinadən planı tənqid edərək, bunu Kiyevin guya “kapitulyasiyası” adlandırıb və ABŞ prezidenti Donald Trampı Moskva ilə güzəştə getməkdə ittiham edib.
CNN daha əvvəl xəbər vermişdi ki, ABŞ prezidentinin xüsusi elçisi Stiv Vitkoff Rusiya və Ukrayna arasında münaqişənin həlli üzrə danışıqlara rəhbərlik edir. Bu arada “Axios” xəbər verir ki, xüsusi nümayəndə Ukrayna lideri Vladimir Zelenski ilə Ankarada keçiriləcək görüşü müzakirə olunan sülh planı ilə bağlı tərəflərin fərqli mövqeləri səbəbindən ləğv edib.
