Prezident İlham Əliyevin 2012-ci ildə “Üçəm” uşaqların doğulmasına görə Soltanovlar ailəsinə hədiyyə etdiyi mənzillə əlaqədar qalmaqal yaşanır.
Biləcəri qəsəbəsi, Rəşid İsmayılov küçəsi 11D ünvanında yerləşən bu 4 otaqlı mənzil uzun müddətdir ki, məhkəmələrdə mübahisə predmetidir.
1xeber.media Gununsesişinfo-ya istinadla xəbər verir ki, mənzil “Kristal-AA” şirkətinin inşa etdiyi binalarda yerləşir. Məlum olub ki, tikinti şirkəti prezidentin hədiyyə etdiyi mənzilə görə ailədən əlavə pul alıb.
Şirkət iddia edib ki, mənzilin sahəsi 3,5 kvadrat çoxdur.
Ailədən əlavə pul alındığını “Kristal-AA” şirkəti də etiraf edir. Bu barədə tikinti şirkətinin məktubu var:
“Biləcəri qəsəbəsində “Kristal-AA” MTK-ya məxsus yaşayış binasının A blokunun 3-cü mərtəbəsində yerləşən ümumi sahəsi 169,02 kv.m. 4 otaqlı, 8 saylı mənzil sərəncam əsasında verilmiş, Rauf Soltanov 2014-cü ildə mənzil üçün (3,5 kvadrat metr) əlavə kvadrata görə 3200 manat ödəniş etmişdir. Cəmi mənzilin sahəsi 172,52 kvadrat metrdir”.
Qeyd edək ki, Daşınmaz Əmlakın Dövlət Reyestri Xidmətinin verdiyi çıxarışda mənzilin sahəsi 150,7 kvadrat metr göstərilib.
Şirkət iddia edir ki, evlərin satışı zamanı mənzil sərhədləri xarici hüdudları (eləcə də balkonlar) götürülür və həmin dövrdə mənzillərin satış qiyməti 1 kvadrat metr üçün 900 manat olub.
Doğulan “Üçəm”lərlə birlikdə ailənin 4 övladı olub. Lakin 2014-cü ildə uşaqların valideynləri – Rauf Soltanov və Günel Nəbiyeva boşanmaq qərarı verib.
Cütlük arasında nikahın pozulmasından sonra məhkəmə prezidentin onlara bağışladığı evlə bağlı da qərar verib. 2016-cı ildə Nəsimi Rayon Məhkəməsinin çıxardığı qərara əsasən, mənzilin 3/2 hissəsi anaya, 3/1 hissəsi isə ataya verilib. Bundan sonra məhkəmənin müəyyənləşdirdiyi qaydada hər ikisinin paylı mülkiyyət hüquqları daşınmaz əmlakın dövlət reyestrində qeydiyyata alınıb.
Sonradan cütlük barışıb, bir neçə il birlikdə yaşasa da, 2022-ci ildə yenidən ayrılıb. Bundan sonra Rauf Soltanov keçmiş həyat yoldaşına təklif edib ki, ya mənzildə onun payına görə kompensasiya ödəsin, yaxud da evi satıb, pulunu paylarına uyğun bölsünlər. Tərəflər öz aralarında razılığa gələ bilmədiyindən bu məsələ də məhkəmə müstəvisinə çıxıb və qərar verilib ki, prezidentin hədiyyə etdiyi mənzil hərraca çıxarılıb satılsın.
Daha sonra həmin mənzillə bağlı daha bir məhkəmə çəkişməsi başlayıb. Bu dəfə Günel Nəbiyevanın anası məhkəmədə 90000 manatlıq iddia qaldırıb. Prezidentin hədiyyə etdiyi mənzilin onun hesabına təmir olunduğunu və 90000 manat xərc çəkdiyini deyən iddiaçı bu məbləği keçmiş kürəkənindən və qızından tələb edib. Daha dəqiqi, əvvəl iddianı yalnız Rauf Soltanova qarşı qaldırıb. Lakin iddia qəbul olunmayıb. Daha sonra qızına və keçmiş kürəkəninə qarşı qaldırıb. O bildirib ki, başqa bir evini satıb, bankdan kredit götürüb, qızılını lombarda qoyub və özünün topladığı pulu da əlavə edərək, həmin evi nəvələri üçün təmir elətdirib. İndi isə mənzil bölündüyünə görə o, öz pulunu tələb edir.
Binəqədi Rayon Məhkəməsi onun iddiasını qismən təmin edib – 54386 manat pulun Rauf Soltanov və Günel Nəbiyevadan tutulub, ona ödənilməsinə qərar verilib.
Rauf Soltanov bu qərardan yuxarı instansiyaya şikayət verib. O bildirib ki, keçmiş qayınanası yalan danışır və məqsəd mənzilin satılıb, payların bölünməsinə əngəl olmaqdır. Onun sözlərinə görə, keçmiş qayınanası öz qızı ilə bu məsələdə əlbirdir və iddia əslində, ona qarşı yönəlib. Formal olaraq, qızını da cavabdeh kimi göstərib.
İddiaçı da 54386 manatlıq nəticədən yuxarı instansiyaya şikayət verib. O, 90000 manatlıq iddianın tam təmin olunmasını istəyib. Lakin apellyasiya məhkəməsi onun yox, keçmiş kürəkəninin şikayətini təmin edib. Qərar verilib ki, onun iddiası Rauf Soltanova münasibətdə ümumiyyətlə, təmin olunmasın. Qızına aid hissəyə gəlincə, apellyasiya məhkəməsi buna münasibət bildirməyib. Çünki Günel Nəbiyeva özünə aid hissədə qərardan şikayətçi olmayıb.
