Rumıniyalı həmkarı Aleks Florentsanın dəvəti ilə Azərbaycan Respublikasının Baş prokuroru Kamran Əliyevin rəhbərlik etdiyi nümayəndə heyəti Buxarestdə işgüzar səfərdədir.
1xeber.media xəbər verir ki, səfər çərçivəsində 23 noyabrda nümayəndə heyəti Buxarest şəhərində Tey Parkında ucaldılmış Azərbaycan xalqının Ümummilli Lideri Heydər Əliyevin büstünü ziyarət edib.
Ziyarət zamanı Ulu Öndərin əziz xatirəsi dərin ehtiramla yad olunub, büstün önünə əklil və güllər düzülüb. Mərasimdə həmçinin Beynəlxalq Məhkəmə Əməkdaşlıq Xidmətinin Baş prokuroru Flavian Popa iştirak edərək, Rumıniya Ali Kassasiya və Ədalət Məhkəməsinin Prokurorluğu adından büstün önünə güllər düzüb.
Səfər çərçivəsində Baş prokuror Kamran Əliyevin rəhbərlik etdiyi nümayəndə heyəti ölkəmizin Rumıniyadakı səfirliyini ziyarət edərək səfirliyin heyəti ilə görüşüb, iş şəraiti ilə maraqlanaraq ölkələr arasında müxtəlif səhələrdə əlaqələrin gücləndirilməsi perspektivləri barədə fikir mübadiləsi aparıb.
Azərbaycan Respublikasının Baş Prokurorluğu tərəfindən hazırlanan “Qarabağ Azərbaycandır” kitabları səfirliyin kitabxanasına hədiyyə olunub.
