Bir qrup azərbaycanlı sənətçi Mədəniyyət Nazirliyini sərt ittihamlara məruz qoyub.
1xeber.media-nın xəbərinə görə, bir qrup sənətçi eyni şəxslərin mütəmadi olaraq tədbirlərə dəvət edildiyini, sənət adamları arasında ayrı-seçkiliyin olduğunu, nazirliyin məsul əməkdaşı Mənzər Nurəliyevanın dəvət qarşılığında hədiyyə və pul aldığını iddia edib. Müğənnilər Almaxanım Əhmədli və Nura Suri, caz ifaçısı və vokalçı Təranə Mahmudova və kamança ifaçısı Şəhriyar Musayev bu bəyanatlarından sonra peşə və ya şəxsi həyatlarında baş verə biləcək hər hansı xoşagəlməz hadisələrə görə Mənzərr Nurəliyevanın məsuliyyət daşıdığını bəyan ediblər.
Almaxanım Əhmədli uzun müddətdir, müğənnilərə qarşı ayrı-seçkilikdən narazılığını ifadə edib. Müğənninin sözlərinə görə, mədəniyyət naziri Adil Kərimli onu Özbəkistanın Mədəniyyət Günlərinin iştirakçıları siyahısına daxil edibmiş. O, bir müddət məşq etsə də, konsertdən bir neçə gün əvvəl adının siyahıdan silindiyini öyrənib. "Məni həmin tədbirdən Mənzər xanım kənarlaşdırıb. Mənimlə bərabər bir neçə həmkarım da kənarlaşdırıldı, amma bu barədə danışmağa cəsarət edən tək mənən", - Əhmədli bildirib. Vokalçı Təranə Mahmudova qeyd edib ki, o, Azərbaycan cazını beynəlxalq tədbirlərdə təmsil etmək istəsə də, Mənzər Nurəliyeva buna mane olur: "Onun öz çevrəsi var və hər il tədbirlərə eyni adamlar dəvət edilir". Müğənni Nura Suri illərlə dövlət tədbirlərində pulsuz çıxış etdiyini, lakin sonradan onlara ayrılan vəsaitin mənimsənildiyini öyrənib. "Biz müğənnilər Mədəniyyət Nazirliyinin bütün tədbirlərində dövlət tədbirləri olduğu üçün pulsuz çıxış edirdik. Bunun müqabilində bizə yararsız diplomlar verildi. Bu, 2004-cü ildən 2022-ci ilə qədər davam edib. Sonradan öyrəndik ki, dövlət vəsait ayırsa da, həmin pullar nazirlik əməkdaşları tərəfindən mənimsənilib", - müğənni iddia edir. Bir neçə gün əvvəl rejissor Cəlaləddin Qasımov da Mədəniyyət Nazirliyi və Azərbaycan Film Agentliyini tənqid etmişdi. Mədəniyyət Nazirliyi öz növbəsində bildirib ki, 2004-2022-ci illəri əhatə edən son zamanlar sosial şəbəkələrdə yayılan iddialar qanunvericiliyə uyğun olaraq araşdırılıb və müvafiq cəzalar tətbiq edilib. Lakin kimin və ya kimlərin cəzalandırıldığı dəqiqləşdirilməyib. Bu arada iddialarda adı keçən Mənzər Nurəliyeva nazirlikdə işləməyə davam edir.
