Rusiya hökuməti Səudiyyə Ərəbistanı ilə iki ölkə vətəndaşları üçün viza tələblərinin qarşılıqlı ləğvi haqqında saziş layihəsini təsdiqləyib.
1xeber.media xəbər verir ki, müvafiq sənəd noyabrın 27-də rəsmi hüquqi informasiya saytında dərc olunub.
Sərəncamda deyilir: “Rusiya Xarici İşlər Nazirliyi tərəfindən təqdim edilmiş, maraqlı federal icra hakimiyyəti orqanları ilə razılaşdırılmış və ilkin olaraq Səudiyyə Ərəbistanı tərəfi ilə nəzərdən keçirilmiş Rusiya Federasiyası Hökuməti ilə Səudiyyə Ərəbistanı Krallığı Hökuməti arasında viza tələblərindən qarşılıqlı imtina haqqında saziş layihəsi təsdiq edilsin”.
Layihədə hər iki ölkənin vətəndaşlarının digər ölkənin ərazisində 90 gün davamlı olaraq vizasız yaşaya bilməsi nəzərdə tutulur. Bu müddət bir neçə dövrə də bölünə bilər, lakin bir təqvim ili ərzində ümumi müddət müəyyən edilmiş müddətdən artıq olmamalıdır.
