Son günlər mediada sabiq deputat Gültəkin Hacıbəyli ilə Prezident Administrasiyasının keçmiş rəhbəri, hazırda dövlətə xəyanət ittihamı ilə ev dustaqlığında saxlanılan Ramiz Mehdiyev arasında bağlanan iddialar geniş müzakirəyə səbəb olub.
1xeber.media xəbər verir ki, bir sıra KİV-lərdə yayılan məlumatlarda qeyd edilir ki, Hacıbəylinin uzun illər əvvəl deputat seçilməsində Ramiz Mehdiyevin təsiri olub və o, bu dövrdə müxtəlif imtiyazlar əldə edib. Eyni iddialara görə, keçmiş deputatın Goranboyda böyük torpaq sahələrinə və təsərrüfat ərazilərinə sahib olması Mehdiyevin yaratdığı şəraitlə əlaqələndirilir. Mətbuatda yayılan siyahılarda Goranboy rayonunda pay torpaqlarında tikilən evlər, müxtəlif təyinatlı sahələr və yarımçıq qalan layihələrin adı çəkilir.
Digər tərəfdən, mediada Gültəkin Hacıbəylinin deputat olduğu vaxt Ramiz Mehdiyevlə bağlı müsbət çıxışları, daha sonra müxalifətə keçdikdən sonra əks mövqe sərgiləməsi də müzakirə olunan məqamlar sırasındadır. Mətbuatda yer alan xəbərlərə görə, Mehdiyevin müxalifətlə gizli əlaqələri və “beşinci kolon” adlandırılan şəbəkə ilə bağlı məlumatlar Hacıbəylinin siyasi fəaliyyətinə də təsir edən faktor kimi göstərilir.
Keçmiş deputat və hazırda radikal müxalifət düşərgəsində fəaliyyət göstərən Gültəkin Hacıbəyli ilə bağlı yeni iddialar yayılıb. Məlumata görə, G.Hacıbəylinin II və III çağırış Milli Məclisin deputatı olması və həmin dövrdə Avropa Şurası Parlament Assambleyasında (AŞPA) təmsil olunmasında Prezident Administrasiyasının (PA) keçmiş rəhbəri Ramiz Mehdiyevin xüsusi rolu olub.
Müxtəlif mənbələr bildirir ki, Gültəkin Hacıbəyli o illərdə Ramiz Mehdiyevə həm şəxsi, həm də ideoloji yaxınlığı ilə seçilib. Son günlər gündəmdə olan müsahibəsində onun R.Mehdiyevi "həssas qəlbli insan" kimi xarakterizə etməsi də bu münasibətlərin davamı kimi qiymətləndirilir.
AŞPA nümayəndə heyətində qeyri-rəsmi rol iddiası
Həmin illərdə nümayəndə heyətinin fəaliyyəti ilə bağlı Prezident Administrasiyasında keçirilən bir çox müzakirələrdə heyətin rəsmi rəhbəri Səməd Seyidovun deyil, məhz Gültəkin Hacıbəylinin iştirak etdiyi deyilir. İddialara görə, fəaliyyətlə bağlı arayışlar və hesabatlar birbaşa Ramiz Mehdiyevə təqdim olunur, onun tapşırıqları digər heyət üzvlərinə də G.Hacıbəyli vasitəsilə çatdırılırmış.
Deputatlıq dövrü və diqqət mərkəzi
Gültəkin Hacıbəyli parlamentdə təmsil olunduğu illərdə rəsmi tədbirlərdə xüsusi diqqət görən şəxslərdən biri kimi xatırlanır. Mənbələr bu diqqətin təkcə R.Mehdiyevlə bağlı olmadığını, onun digər deputatlarla da yaxın münasibətlər qurduğunu iddia edir.
Müxalifətə keçid və davam edən əlaqələr
2010-cu ildə deputatlıq müddəti bitdikdən sonra G.Hacıbəylinin müxalifət düşərgəsinə qoşulması da müxtəlif şərhlərə səbəb olub. İrəli sürülən məlumatlara görə, onun "Milli Şura"ya daxil olması Ramiz Mehdiyevlə əlaqələrinin davamının göstəricisi kimi şərh edilir. Bildirilir ki, bu proses həmin dövrdə R.Mehdiyevin mitinqlərlə bağlı strateji planlarının bir hissəsi olub.
Mənbələr iddia edir ki, 2010-cu illərin əvvəlindən etibarən radikal müxalifətin mitinqlərinin intensivləşməsi də bu əməkdaşlıq xətti ilə bağlı olub. 2019-cu ildə Ramiz Mehdiyev vəzifədən uzaqlaşdırıldıqdan sonra isə həm bu fəaliyyətlərin, həm də vasitəçilik rolunun aradan qalxdığı bildirilir.
Maddi dəstək iddiaları
Digər məlumatlara əsasən, Gültəkin Hacıbəylinin keçmiş həyat yoldaşı Mahmud Mehdiyevin prokurorluq orqanlarında yüksəlişində də Ramiz Mehdiyevin dəstəyi olduğu iddia edilir.
Həmin mənbələr həmçinin qeyd edir ki, 2005-ci ildə Bakının mərkəzində yerləşən iki mənzilin Gültəkin Hacıbəylinin ailə üzvlərinin adına rəsmiləşdirilməsi və onun Goranboy rayonunda geniş torpaq sahələri əldə etməsi də bu əlaqələrin nəticəsi kimi göstərilir. (Milli.az)
