Professor, sabiq deputat Cəmil Həsənlinin DTX-da verdiyi ifadə zamanı ona ünvanlanan suallar barədə yeni detallar məlum olub.
1xeber.media xəbər verir ki, o, sosial şəbəkədə yazdığı məlumata görə, Dövlət Təhlükəsizliyi Xidmətində ona bir neçə istiqamət üzrə suallar verilib.
Cəmil Həsənli bildirib ki, sorğu əsasən Ramiz Mehdiyevin istintaqı çərçivəsində aparılıb. O qeyd edib ki, Mehdiyev vəzifədə olduğu dövrdə onun fəaliyyətini ən çox tənqid edən şəxslərdən biri məhz özü olub.
Professorun sözlərinə görə, DTX əməkdaşları Ziyalılar Forumu və Milli Şura barədə ayrıca maraqlanıblar:
• bu qurumların fəaliyyət istiqamətləri,
• hansı məqsədlə yaradılması,
• təşkilati strukturu,
• xarici əlaqələrə dair suallar ünvanlanıb.
Həsənli qeyd edib ki, DTX-nın əsas maraqlandığı mövzulardan biri bu qurumların maliyyələşməsi olub:
“Tez-tez soruşurdular ki, Ziyalılar Forumu və Milli Şura haradan maliyyələşir. Mən də dedim ki, maliyyə olmayıb ki, haradan maliyyələşmə olsun.”
Professorun ifadəsinə görə, sorğunun bir hissəsi 2013-cü il prezident seçkilərində onun namizədliyi, seçki dönəmi və həmin il baş verən proseslərlə bağlı suallardan ibarət olub.
Həsənli əlavə edib ki, “Milyarderlər ittifaqı” haqqında da sorğu aparılıb.
Onun sözlərinə görə, ümumi söhbət 3 saat yarım davam edib.
Xatırladaq ki, Cəmil Həsənli bu gün DTX-ya çağırıldıqdan sonra sərbəst buraxılıb. Bundan öncə isə hava limanında ona ölkədən çıxışın məhdudlaşdırıldığı bildirilib.
