“Muğanbank”ın Nərimanov rayonu, Əhməd Rəcəbli 21B ünvanında satışa çıxarılan baş ofisi ilə bağlı yeni iddialar var.
1xeber.media xəbər verir ki,“Yeni Sabah”a edilən müraciətə görə, sözügedən obyektin satılmasının əsas səbəbi, “Faktor Lizinq” şirkətinin maliyyə problemləri ilə üz-üzə qalmasıdır.
Bəhs olunan lizinq şirkətinin rəhbəri Ehtiram Əliyev sabiq deputat, hazırda ləğv prosesində olan “Muğanbank”ın sahibi Əhməd Vəliyevin bacısı oğludur.
İddiaları səsləndirən vətəndaş Abbasov Vüqar Elbrus oğlu bildirib ki, Əhməd Vəliyevin artıq fəaliyyətini dayandıran bankın baş ofisini satmaq məqsədi, Ehtiram Əliyevə dəstək olmaqdır.
Məsələ ilə bağlı danışan “Faktor Lizinq” şirkətinin meneceri Ehtiram Əliyev deyib ki, səsləndirilən iddialar əsassızdır:
“Muğanbank”la heç bir hüquqi əlaqəm olmayıb və yoxdur. Hər hansı bir əmlakının satışına dair məlumata malik deyiləm”.
Xatırladaq ki, Əhməd Vəliyev daha öncə “Muğanbank”ın baş ofisinin satışa çıxarıldığını təsdiqləyib. Ə.Vəliyev satışa çıxarılan əmlakın qiymətini açıqlamayıb.
Qeyd edək ki, “Muğanbank” 1992-ci ildə yaradılıb. Mərkəzi Bankın 18 oktyabr 2023-cü il tarixli qərarı ilə lisenziyası ləğv edilib.
Bankın baş ofisi Bakı şəhəri, Nərimanov rayonu, Əhməd Rəcəbli 21B ünvanında yerləşdirdi. Həmin ofis satışa çıxarıldığına görə “Muğanbank” Xətai rayonu, Xocalı prospekti 36A ünvanına köçüb.
