Rəhmətlik Elçibəyin sözləridir: "Bir fağır prezident tapmısınız, sağdan da döşəyirsiniz, soldan da..."
Mən saçını-saqqalını Azərbaycanda ağardan, Xoşqədəmi baxçada, Zauru bələkdə, Elgizi “karşok”da görən adamam. Heç kim azərbaycanlıları məndən yaxşı tanıya bilməz. Yeddi babamı tanıyıram, yeddisi də təmiz azərbaycanlı olub. Qanımız başqa millətlərin qanı ilə qarışmayıb.
Bu qədər izahatı əbəs yerə vermirəm. Demək istəyirəm ki, indi yazacaqlarım, mənim ailəmə, öz övladlarıma, hətta yaxın-uzaq qohumlarıma da aiddir. Xətrinizə dəyməsin, bu, reallıqdır: gərək azərbaycanlılarla heç vaxt aradakı pərdəni götürməyəsən. Üz verən kimi başına çıxacaqlar...
Şübhəsiz ki, Emin Əmrullayev səmimi nazirdir. Cəmiyyətə açıqdır, problemləri gizlətmir, “malalamaqla” arası yoxdur. Adam tez-tez mətbuat konfransı keçirib nəinki aparıcı media subyektlərinin əməkdaşlarının, hətta "İpəkqurdu" qəzetinin müxbirinin suallarını da canla-başla, həvəslə cavablandırır.
İşi başından aşsa da, Emin müəllim həftədə iki dəfə Xankəndiyə gedib-gələn Arzu müəllimə ilə bağlı müzakirələrə də qoşulub, gənc pedaqoqa uğurlar arzulayıb.
Dünən gördüm ki, sosial şəbəkə istifadəçilərindən biri nazirin “səhv”ini tutub: “Vergül qoymamısınız”.
Emin Əmrullayev yazdığı mətnə vergül artırıb, sonra da həmin izləyiciyə təşəkkür edib.
Mənimçün maraqlıdır: görəsən, həmin yoldaş fövqəladə hallar naziri Kəmaləddin Heydərova da irad bildirə bilərmi?
Hay-hay bildirər. Heç Kəmaləddin Heydərovun yüz metrliyində də yaxın dura bilməz.
Naziri də, lap Baş naziri də tənqid etmək olar. Sağlam tənqid inkişafın rəhnidir. Jurnalist marağı güc gəldiyi üçün yuxarıdakı sualları verdim. Həmin sosial şəbəkə istifadəçisinə xüsusi iradım yoxdur. Amam sosial şəbəkələr üçün xarakterik olan münbit şəraitdən istifadə edib Elm və təhsil nazirinin ünvanına xoşagəlməz idadələr işlədən adamlara iradım var: tərbiyəli olun!
Bir fağır nazir tapmışıq, sağdan da döşəyirik, soldan da...
A kişilər, o, şagirdlərin naziri olsa da, şagird deyil. Müəllim damarı tutsa, hamımızı qabağında oturdub uşaq kimi danlayacaq.
Buna haqqı çatır.
Sosial şəbəkələrdə elə adamlar var ki, özlərini sinifdə nadinclik edən tərbiyəsiz uşaq kimi aparırlar...
L.Səfiyarlı
metbuat.az
