İçərişəhərdə Azərbaycan Milli Ensiklopediyanın binası qarşısında ucaldılmış Həsən bəy Zərdabinin heykəlinin yer dəyişdirməsi mövzusu gündəmə gəlib.
Azərbaycan Yazıçılar Birliyinin (AYB) sədri, Xalq yazıçısı Anar Rzayev heykəlin birinci mərtəbəsində restoran yerləşən bir məkanda bu abidənin qalmasını uyğun bilməyib.
"İndi heykəl restoranın qapıçısı kimi görünür. Təklif edirəm ki, heykəl Pedaqaoji Universitetin bağına köçürülsün”, - AYB sədri bildirib
O, heykəlin hazırkı vəziyyətdə “restoranın qapıçısı kimi göründüyünü” vurğulayaraq, onun Pedaqoji Universitetin bağına köçürülməsini təklif edib.
Xatırladaq ki, Ensiklopediya binasının birinci mərtəbəsində “La Quzu” restoranı yerləşir.
Resoranın direktoru Anar Xanbabayev “Yeni Sabah”a bildirib ki, Anar Rzayevin "La Quzu"nun daimi müştərilərindən biridir:
“Restoranda xüsusi şəkillər bölməsi var və həmin bölmədə Anar Rzayevlə birgə fotomuz da yerləşdirilib. Bu məsələdə problem nədir ki?!
Heykəllə bağlı qərarı yalnız İçərişəhər Dövlət Tarix-Memarlıq Qoruğu İdarəsi verə bilər. Bu, “La Quzu” restoranına aid olan bir məsələ deyil.
Restoranla heykəl arasında xeyli məsafə var, Zərdabi heykəlinə heç bir aidiyyatımız yoxdur, giriş qapımız da tamam ayrıdır. Heykəlin yerləşdiyi ərazi turistik zonadır, turistlər gəlib orada şəkil çəkirlər və bu, restoran olaraq bizə heç bir problem yaratmır”.
Qeyd edək ki, İçərişəhərdə, Böyük Qala küçəsi 41 ünvanında Həsən bəy Zərdabinin heykəli 1979-cu ildə qoyulub. Heykəlin müəllifi heykəltəraş Elmira Hüseynova, memarı isə Zeynəb Quliyevadır. Bürüncdən hazırlanmış heykəlin ümumi hündürlüyü 4 metrdir.
