Xəbər verdiyimiz kimi Azərbaycan Respublikası Dövlət Təhlükəsizliyi Xidmətində R.Mehdiyev və digərləri barəsində “dövlət hakimiyyətini ələ keçirməyə yönələn hərəkətlər” ittihamı ilə istintaqı aparılan cinayət işi üzrə növbəti qərar bəlli olub.
Cinayət işi üzrə toplanmış materiallar əsasında, Azərbaycan Respublikası Baş nazirinin sabiq birinci müavini, uzun illər Ramiz Mehdiyevin müdafiəsi nəticəsində məsuliyyətdən kənarda qalmış Abbas Abbasovun qeyd olunan cinayət işi üzrə istintaqa cəlb edilməsi barədə qərar qəbul edilib, ölkə hüdudlarından kənarda olmaqla istintaqdan yayındığı üçün barəsində axtarış elan edilib. Məlumdur ki, Abbas Abbasov uzun illərdir Rusiya vətəndaşıdır və bu ölkədə yaşayır. Belə olan halda qanunla Abbasovun Azərbaycana gətirilməsi mümkündürmü?
Mövzunu konkret.az-a vəkil Turan Abdullazadə şərh edib:
“Əgər Abbas Abbasov Rusiya Federasiyasının vətəndaşıdırsa, bu zaman əsas hüquqi maneə ortaya çıxır. Rusiya Federasiyasının Konstitusiyası və digər qanunvericilik aktlarına əsasən, Rusiya Federasiyası öz vətəndaşlarını xarici dövlətlərə ekstradisiya etmir. Rusiya vətəndaşıdırsa, o zaman Azərbaycana ekstradisiyası praktik olaraq mümkün deyil. Hətta ağır cinayətlər üzrə belə Rusiya bu mövqedən geri çəkilmir. Burada əsas məsələ Rusiya Federasiyasının öz daxili təşəbbüsü və Azərbaycan Respublikasına bununla bağlı yardım edib-etməyəcəyidir. Yəni, Rusiya istərsə, Abbas Abbasovun təhvil verilməsi təmin oluna bilər.
Lakin aşağıdakı hallarda nəzəri imkan yarana bilər:
— Abbas Abbasov Rusiya vətəndaşlığından çıxarılarsa;
— Və ya üçüncü ölkəyə səfər edərsə (məsələn, Türkiyə, Avropa ölkəsi) və orada saxlanılarsa;
— və Həmin ölkələr ilə Azərbaycanın ekstradisiya müqaviləsi varsa;
Praktikada çox vaxt belə hallar üçün “beynəlxalq axtarış” (Interpol Red Notice) elan edilir və şəxs üçüncü ölkədə saxlanılır”.
