Böyük Britaniya hökuməti dondurulmuş Rusiya aktivlərinin müsadirəsi təşəbbüsünü irəli aparmamaq qərarına gəlib.
Söhbət ümumi dəyəri 8 milyard funt sterlinq (təxminən 9,1 milyard avro) olan vəsaitdən gedir.
1xeber.media xəbər verir ki, bu barədə "The Financial Times" qəzeti məlumat yayıb.
Qərar Avropa İttifaqı ölkələri arasında bu məsələ ilə bağlı vahid mövqenin formalaşmaması fonunda qəbul edilib. Qeyd olunur ki, Aİ-də analoji addım dəstək qazanmayıb.
Bundan əvvəl, dekabrın əvvəlində Londonda Rusiya vəsaitlərinin Ukraynaya yardımın maliyyələşdirilməsi üçün müsadirə edilməsi imkanları müzakirə olunurdu. Baş nazir Kir Starmer bu ideyanı dəstəkləsə də, Böyük Britaniyanın bank sektoru nümayəndələri təşəbbüsə qarşı çıxıblar.
Hökumət nümayəndəsi bildirib ki, Böyük Britaniya təkbaşına hərəkət etmək niyyətində deyil və beynəlxalq tərəfdaşların razılığı olmadan əlavə addımlar atmayacaq. Onun sözlərinə görə, söhbət təkcə Aİ ölkələrindən yox, həm də Avstraliya və Kanadadan gedir.
Böyük Britaniyanın maliyyə naziri Reyçel Rivz isə Londonun Ukraynaya dəstəyi davam etdirəcəyini və zəruri maliyyələşmənin təmin olunması üçün tərəfdaşlarla təcili işləyəcəyini açıqlayıb. Xüsusilə, Dünya Bankına verilmiş zəmanətlərin şərtlərinin dəyişdirilməsi və 2 milyard dollar (təxminən 1,7 milyard avro) məbləğində öhdəliyin daha erkən, 2026-cı ilə keçirilməsi planlaşdırılır.
Bundan başqa, hökumət Kiyevə dəstək üçün “B planı” adlandırılan alternativ mexanizmləri də nəzərdən keçirir. Eyni zamanda, Böyük Britaniya Ukraynaya hər il hərbi ehtiyaclar üçün 3 milyard funt sterlinq ayırmaq öhdəliyini saxlayır.
Məsələnin fonunda Avropa İttifaqı sammitinin nəticələri də diqqət çəkir. Dekabrın 19-na keçən gecə Avropa Şurasının sədri Antoniu Koşta Aİ-nin 2026–2027-ci illərdə Ukraynaya 90 milyard avro ayırmağı planlaşdırdığını bildirib. Maliyyələşmənin ittifaq büdcəsinin zəmanətləri əsasında birgə borclanma hesabına təmin olunacağı qeyd edilir.
Almaniya kansleri Fridrix Merts isə açıqlayıb ki, Ukrayna müvafiq krediti yalnız Rusiyanın müharibənin vurduğu zərərə görə reparasiyalar ödəməsindən sonra geri qaytarmalı olacaq. Onun sözlərinə görə, Moskva kompensasiyadan imtina edərsə, Avropa İttifaqı Ukraynanın borcunun ödənilməsi üçün dondurulmuş Rusiya aktivlərindən istifadə etməyi planlaşdırır.
