1xeber.media xəbər verir ki, Rusiyanın Ural bölgəsində fəaliyyət göstərmiş Azərbaycan diasporunun sabiq rəhbəri Şahin Şıxlinski və onunla əlaqəli şəxslər barəsində seçilmiş həbs qətimkan tədbirinin müddəti uzadılıb. Kirov rayon məhkəməsinin qərarına əsasən, Şahin Şıxlinski və istintaqın “etnik dəstə” kimi təqdim etdiyi digər təqsirləndirilən şəxslər 31 may 2026-cı ilədək istintaq təcridxanasında saxlanılacaqlar.
Qərar ilkin məhkəmə iclasında qəbul edilib. Məhkəmə bunu hazırkı həbs müddətinin 30 dekabr 2025-ci ildə başa çatması və əsas məhkəmə prosesinin 15 yanvar 2026-cı il tarixinə təyin olunması ilə əsaslandırıb. Bildirilir ki, Şahin Şıxlinski və digər təqsirləndirilənlər işə münsiflər məhkəməsində baxılmasını seçiblər. Növbəti iclasda münsiflər kollegiyasının formalaşdırılması nəzərdə tutulur.
Məsələnin siyasi və ictimai rezonansı isə bununla bitmir. Şahin Şıxlinski və onun oğlu Mutvalı Şıxlinskinin həbsi Rusiyanın Azərbaycan diasporuna münasibətdə getdikcə sərtləşən və açıq düşmənçilik xarakteri alan xəttinin bariz nümunəsi kimi qiymətləndirilir. Bu ilin 1 iyulunda qurama və provokativ əməliyyatla həbs edilən ata-oğulun saxta və mübahisəli ittihamlarla mühakimə olunduğu bildirilir.
Xüsusilə diqqət çəkən məqam ondan ibarətdir ki, mənbələrin məlumatına görə, istintaq prosesində Şahin Şıxlinskiyə qarşı aparılan sorğu və istintaq hərəkətlərinin erməni mənşəli istintaqçılar tərəfindən həyata keçirilməsi təmin edilib. Bu isə işin açıq-aşkar qərəzli müstəviyə daşındığını və prosesin siyasi sifariş xarakteri daşıdığını göstərən əsas faktorlardan biri kimi dəyərləndirilir.
Musavat.com ilk gündən baş verənləri Azərbaycan təyyarəsinin Rusiya tərəfindən vurulmasından sonra iki ölkə arasında yaranmış “soyuq müharibə”nin tərkib hissəsi kimi qiymətləndirib. Həmin hadisədən sonra Rusiyada Azərbaycan diasporuna qarşı təzyiqlərin kəskin şəkildə artdığı, izləmə, həbslər və iqtisadi basqıların sistemli xarakter aldığı hər kəsin xatirindədir. Yekaterinburqda baş verən hadisələr, Səfərov qardaşlarının öldürülməsi, bir sıra diaspor liderlərinin həbs edilməsi, Azərbaycan mənşəli iş adamlarının əmlaklarının müsadirə olunması bu prosesin ən ağır epizodları sırasında yer aldı.
Şahin Şıxlinski və onun oğlu ilə bağlı davranış Rusiyanın bu məsələdə geri addım atmaq niyyətində olmadığını, əksinə, Azərbaycan dövlətinə və diasporuna təzyiq və zorakılıq mesajları verməyə çalışdığını açıq şəkildə ortaya qoyur. Moskvanın bir tərəfdən rəsmi bəyanatlarda Azərbaycanı “müttəfiq” adlandırması, digər tərəfdən isə real addımlarla tam əks mövqe sərgiləməsi ciddi ziddiyyət kimi qiymətləndirilir.
Qeyd olunur ki, Rusiya rəhbərliyi səviyyəsində Azərbaycan təyyarəsinin vurulmasına görə məsul şəxslərin cəzalandırılacağı və kompensasiyanın ödəniləcəyi barədə verilən vədlər, o cümlədən prezident Putinin 9 oktyabrda Düşənbədə verdiyi sözlər indiyədək yerinə yetirilməyib. Əksinə, son hadisələr Kremlin regionda və xüsusilə Azərbaycanla münasibətlərdə klassik imperiya reflekslərini davam etdirdiyini göstərir.
Baş verənlər fonunda Şahin Şıxlinski işi təkcə bir nəfərin taleyi ilə bağlı məhkəmə prosesi deyil, Rusiyanın Azərbaycan diasporuna və ümumilikdə Azərbaycan dövlətinə münasibətinin real göstəricisi kimi dəyərləndirilir.
Əlbəttə ki, Azərbaycan bir müstəqil və qürurlu dövlət olaraq baş verənləri cavabsız buraxmır və buraxmayacaq da...
Musavat.com
