Türk dünyasında ədəbi-mədəni həmrəyliyin möhkəmləndirilməsi, ortaq dəyərlərin qorunması və gələcək nəsillərə ötürülməsi bu gün təkcə yaradıcılıq deyil, eyni zamanda, mənəvi məsuliyyət tələb edən mühüm missiyadır. Məhz bu baxımdan Türk Dünyası Qadın Şairlər Birliyinin yaradılması təşəbbüsü Türk dünyasının ədəbi həyatında yeni və əhəmiyyətli bir mərhələnin başlanğıcı kimi dəyərləndirilməlidir.
1xeber.media xəbər verir ki,bu fikirləri Azərtac -a açıqlamasında Əlişir Nəvai adına Özbəkistan Dövlət Universitetinin fəxri professoru, Türk Dünyası Qadın Şairləri Birliyinin rəhbəri, tanınmış şairə Xuraman Muradova bildirib.
Onun sözlərinə görə, birliyin yaradılması ilə bağlı qərarın Şimali Kipr Türk Cümhuriyyətində keçirilən “Türk Dünyası I Lefkoşa şeir axşamları” çərçivəsində qəbul olunması təsadüfi deyil. Bu addım Türk dünyasında qadın şairlərin rolunun artdığını, onların yalnız ədəbi prosesin iştirakçısı deyil, həm də mədəni birliyin daşıyıcısı kimi çıxış etdiyini nümayiş etdirir. Birliyin əsas məqsədi qadın şairlərin yaradıcılığının təbliği, gənc istedadlara dəstək, ölkələr arasında ədəbi-mədəni körpülərin qurulması və Türk dünyasında birlik ruhunun şeir vasitəsilə daha da gücləndirilməsidir.
“Qısa müddətdə birliyin fəaliyyəti beynəlxalq miqyasda öz bəhrəsini verməyə başlayıb. Türkiyənin Kayseri şəhərində keçirilən beynəlxalq ədəbi toplantı, eləcə də Elazığda baş tutan 28-ci “Beynəlxalq Xəzər şeir axşamları” Türk dünyası şairlərinin bir araya gələrək ortaq düşüncə və duyğuları paylaşdığı mühüm platformalara çevrilib. Bu tədbirlərdə qadın şairlərin fəal iştirakı, səsləndirilən poetik nümunələr türk milli düşüncəsinin və mənəvi dəyərlərinin vahid səs kimi təqdim olunmasına xidmət edib.
Xüsusilə qeyd olunmalıdır ki, bu cür tədbirlər yalnız poeziya gecələri ilə məhdudlaşmır, eyni zamanda, panel müzakirələri, gənclərlə görüşlər, təhsil müəssisələrində keçirilən ədəbi dialoqlar vasitəsilə Türk dünyasının gələcək nəsillərinə yönəlmiş strateji mahiyyət daşıyır. Qadın şairlərin bu prosesdə fəal mövqeyi onların cəmiyyətin mənəvi inkişafında oynadığı rolu bir daha təsdiqləyir”, - deyə Türk Dünyası Qadın Şairlər Birliyinin rəhbəri vurğulayıb.
O qeyd edib ki, bu birlik qarşıdakı dövrdə də Türk dövlətlərində irimiqyaslı ədəbi layihələrin həyata keçirilməsini, ortaq antologiyaların hazırlanmasını, gənc qadın şairlər üçün yaradıcılıq platformalarının qurulmasını və beynəlxalq əməkdaşlığın daha da genişləndirilməsini əsas prioritetlər kimi müəyyənləşdirir.
Xuraman Muradova diqqətə çatdırıb ki, birliyin fəaliyyətinin sistemli və geniş coğrafiyada koordinasiyalı şəkildə həyata keçirilməsi məqsədilə ölkələr üzrə başqan yardımçıları təyin olunub. Türkiyədə bu vəzifəni İnci Okumuş, Azərbaycanda Aysel Xanlarqızı, Özbəkistanda Nargiz Asadova, Qırğızıstanda Nurkız Riskulqızı, Qazaxıstanda Assel Ospan, Makedoniyada Leyla Şerif Emin, Şimali Kiprdə Feyzan Korur, Kərkükdə Gülzar Bayatlı, Başqırdıstanda Tenzilia Davletberdina, Tatarıstanda isə Şemsiye Cihangirova icra edir. Bu təyinatlar Türk dünyasının müxtəlif bölgələrində qadın şairlərin ədəbi-mədəni fəaliyyətinin əlaqələndirilməsi, ortaq layihələrin reallaşdırılması və birlik ruhunun möhkəmləndirilməsi baxımından mühüm əhəmiyyət daşıyır.
“Məqsədimiz Türk dünyasının qadın səsini, ana ruhunu və poetik düşüncəsini qlobal mədəni məkanda daha aydın və təsirli şəkildə tanıtmaqdır. Əminliklə demək olar ki, bu birlik Türk xalqları arasında ədəbi və mədəni əlaqələrin möhkəmlənməsinə, dostluq və həmrəyliyin dərinləşməsinə, eləcə də Türk dünyasının ortaq gələcəyinə xidmət edən mühüm bir ədəbi platforma kimi fəaliyyətini davam etdirəcək”, - deyə birliyin rəhbəri fikirlərini tamamlayıb.
