1xeber.media xəbər verir ki, Malayziya məhkəməsi keçmiş baş nazir Najib Razakı 1Malaysia Development Berhad (1MDB) milli investisiya fondunun vəsaitlərini mənimsəməkdə ittiham edərək əlavə 15 il həbs cəzasına məhkum edib.
“Ali Məhkəmə 1MDB işində təqsirli bilinən Razakı 15 il həbs və 2,82 milyard dollar məbləğində cərimə cəzasına məhkum edib”, - deyə orqan məlumat yayıb.
“Star” dəqiqləşdirib ki, keçmiş baş nazir vəzifə səlahiyyətlərindən sui-istifadə və çirkli pulların yuyulmasında təqsirli bilinib.
Nəşrin məlumatına görə, cərimə ödənilməsə, onun həbs müddəti 40 ilədək artacaq. Bundan əlavə, hakim yeni həbs müddətinin yalnız keçmiş baş nazirin 2028-ci ildə başa çatması planlaşdırılan hazırkı həbs müddətini başa vurmasından sonra başlayacağına qərar verib.
2020-ci ildə Najib Razak 1MDB ilə əlaqəli digər işlərdə təqsirli bilinərək 12 il müddətinə azadlıqdan məhrum edilib. Bu cəza sonradan 2028-ci ilə endirildi.
Malayziyada inkişaf layihələrini maliyyələşdirmək üçün yaradılan 1MDB fondu 2009-2014-cü illər arasında beynəlxalq cinayət sxemində ondan milyardlarla dollar oğurlandıqdan sonra qalmaqala qarışıb. Qalmaqal hökumətin çoxsaylı araşdırmalarına və 2018-ci ildə Razakın istefasına səbəb olub.
ABŞ Ədliyyə Nazirliyinin məlumatına görə, dövlət məmurlarına rüşvət vermək, bu məqsədlə xüsusi olaraq yaradılmış və keçmiş baş nazirin nəzarətində olan fondu doldurmaq, zinət əşyaları, incəsənət və daşınmaz əmlak almaq üçün istifadə olunan fonddan ən azı 4,5 milyard dollar oğurlanıb.
