1xeber.media xəbər verir ki, Avropa Şurasının (AŞ) baş katibi Alen Berset Ukraynada gələcək sülh üçün üç əsas meyar adlandırıb.
Bunlardan birincisi, o qeyd etdi ki, hesabatlılıqdır. Bersetin fikrincə, bu istiqamətdə atılan addımlardan biri münaqişə zamanı dəymiş zərərin ödənilməsinə dair qərarları qəbul edəcək Ukraynanın Beynəlxalq İddia Komissiyasının yaradılmasıdır.
İkinci meyar qanunun aliliyinə hörmətdir. Avropa Şurası baş katibinin vurğuladığı kimi, sülh yolu ilə nizamlanma və müharibədən sonrakı yenidənqurma beynəlxalq hüquqa, xüsusən də İnsan Hüquqları üzrə Avropa Konvensiyasına əsaslanmalıdır.
Üçüncü meyar kimi o, Ukrayna üçün etibarlı təhlükəsizlik təminatlarının olmasını və gələcəkdə münaqişənin genişlənməsinin qarşısını alacaq effektiv hüquqi mexanizmlərin mövcudluğunu göstərib.
Bundan əvvəl ABŞ prezidenti Donald Tramp bəyan etmişdi ki, Rusiya və Ukrayna indi Ukrayna münaqişəsinin həllinə əvvəlkindən daha yaxındır. O, bazar günü, dekabrın 28-də Floridada Ukrayna lideri Vladimir Zelenski ilə danışıqlardan sonra sülh prosesində irəliləyişdən danışıb.
