Azərbaycanda 2026-cı ilin ilk günlərində əhalinin bir hissəsi “Azəriqaz”ın xoş olmayan sürprizi ilə üzləşdi. Bayram əhval-ruhiyyəsində olmalı insanlar evdə ola-ola “Azəriqaz”ın sayəsində çöldəki soyuğu, şaxtanı canlarında hiss etdilər.
1xeber.media Bizimyol.info-ya istinadla xəbər verir ki, Bakıda, Sumqayıtda və daha bir neçə rayonda smart tipli sayğacdan istifadə edən abunəçilər qazsız qaldılar.
Onların bir hissəsi iki gün ərzində ödəniş terminallarında karta pul köçürə bilmirdi. Terminallarda əməliyyat zamanı “abonent məlumatları tapılmır” və s. bu kimi yazılar ortaya çıxır və ödənişlər qəbul edilmirdi. Əhalinin bir hissəsi isə karta pulu yükləyə bilsə də, ödənilən məbləğlərin sistemə ötürülməsində problem vardı. Yəni kartdakı vəsait sayğacda görünmürdü. Nəticə isə bu idi ki, evlərdə iki gün ərzində qaz olmadı. Uşaqlar, qocalar, xəstələr bundan əziyyət çəkdilər.
Bayram günlərində gücləndirilmiş iş rejimində işləməli olan “Azəriqaz” əvvəl heç əziyyət çəkib açıqlama da vermək istəmirdi. Sonra dedilər ki, problem terminallardadır. Terminal şirkətləri isə bəyan etdilər ki, xeyr, bizimlə bağlı problem yoxdur. Ardınca “Azəriqaz”ın açıqlaması bu oldu ki, ilin əvvəlidir, müraciətlərin sayı çox olub, ona görə də sistem yüklənib. “Smart tipli qaz sayğaclarının ödəniş sistemində yanvarın 1-dən etibarən yaranmış problem həmin gün gecə 00.00-da aradan qaldırılsa da, kütləvi əməliyyatlar aparılması zamanı sistem təkrar xətalarla üzləşdi. Təqvim ilinin əvvəli olması ilə əlaqədar müraciət sayı da çox olur. Müraciət sayı çox olduğundan yenidən müəyyən xətalarla üzləşdik. Yaranmış çətinliyin qısa müddətdə aradan qaldırılması istiqamətində mütəxəssislər ciddi şəkildə iş aparır”, - bu, “Azəriqaz”ın mətbuat katibi Eldəniz Vəliyevin həmin vaxt yaydığı açıqlamadır.
“Azəriqaz” kimi bir qurumun qış fəslində, ilin əvvəlində, yəni daha çox tələbat olan vaxtlarda buna hazır olmaması, “müraciət sayına görə” sistemin çökməsi təəccüb doğurur. Yüzmilyonlarla vəsait ayrılan bir qurum indiyədək dayanıqlı bir sistem yarada bilməyib?
Hüquq müdafiəçisi Mirvari Qəhrəmanlı deyir ki, yanvarın ilk günlərində yaşananlar çox ciddi problemdir, lakin “Azəriqaz” tərəfindən indiyədək ağlabatan rəsmi açıqlama, konkret həll planı təqdim olunmayıb. Hüquq müdafiəçisinin sözlərinə görə, “Azəriqaz”da kadr boşluğu da var:
“Mövcud kadr siyasəti və texniki nəzarətsizlik bu böhranın əsas səbəblərindən biridir. Nəticədə yaranmış vəziyyət artıq çox böyük miqyasda problemə çevrilib. Hesab edirəm ki, “Azəriqaz” əhali üçün yeni “sayğac” əməliyyatı hazırlayır”.
