Azərbaycanın İnsan Hüquqları üzrə Müvəkkili (Ombudsman) Səbinə Əliyevanın nümayəndələri “Qurtuluş” Reablitasiya Mərkəzində monitorinq aparıb.
1xeber.media xəbər verir ki,bunu “Yeni Sabah”a mərkəzin rəhbəri Ceyhun Salmanov deyib.
Onun sözlərinə görə, ombudsmanın təmsilçiləri “Qurtuluş”dakı vəziyyəti yüksək qiymətləndiriblər.
“Gəldilər və yüksək təəssüratlarla getdilər. Düşünürük ki, bundan sonra problemli mərkəzlərin hər biri sıradan çıxacaq. Yalnız vicdanla fəaliyyət göstərən mərkəzlər işini davam etdirəcək”.
C.Salmanov tanınmış teleaparıcı Nəsimi Nəbizadənin mərkəzə qayıdıb-qayıtmaması məsələsinə də aydınlıq gətirib:
“Nəsimi Nəbizadə evindədir. Dünən telefonla danışdıq. Bildirdi ki, qardaşının tutulması ilə bağlı başı qarışıqdır. Məsələ həllini tapdıqdan sonra gələcək. Lazım olarsa birlikdə hərəkət edəcəyik. Telefonuna kontur da yüklədik. İnşallah tezliklə görüşəcəyik”.
Qeyd edək ki, Nəsimi Nəbizadə ötən ilin sentyabrında “Qurtuluş” Reablitasiya Mərkəzinə yerləşdirilmişdi. O, yanvarın 6-da mərkəzdən qaçıb.
Xatırladaq ki, N.Nəbizadənin qardaşı Elnur Nəbizadə həbs olunub.
Sumqayıt Şəhər Polis İdarəsi əməkdaşlarının keçirdikləri əməliyyatla iki nəfər - Saray qəsəbə sakinləri əvvəllər narkotiklərlə əlaqəlli cinayətə görə məhkum olunmuş 39 yaşlı Tərlan Talıbov və 35 yaşlı Yusif Cəbrayılov saxlanılıblar. Onlardan ümumi çəkisi 12 kiloqram 962 qram narkotik maddə olan marixuana aşkarlanıb.
Həmin şəxslərin narkotik vasitəni E.Nəbizadədən aldıqları müəyyən edilib. Polis əməkdaşlarının keçirdiyi tədbirlərlə E.Nəbizadə tutulub.
Sumqayıt Şəhər Məhkəməsinin qərarı ilə təqsirləndirilən şəxslərin hər biri barəsində 4 aylıq həbs qətimkan tədbiri seçilib.
