1xeber.media xəbər verir ki, Beynəlxalq Atom Enerjisi Agentliyinin (BAEA) baş direktoru Rafael Qrossi RTVE-yə verdiyi müsahibədə bildirib ki, Ukraynadakı döyüşlər zamanı nüvə qəzası riski nüvə silahının istifadə ehtimalından daha yüksəkdir.
"Hesab edirəm ki, bu münaqişədə nüvə silahının istifadə ehtimalı o qədər də yüksək deyil. (...) Hazırda biz nüvə silahının istifadəsindən daha çox nüvə qəzası ehtimalından narahatıq", - deyə o bildirib.
Qrossi qeyd edib ki, Zaporojye Atom Elektrik Stansiyası (ZNPP) ətrafında vəziyyət son dərəcə qeyri-sabit olaraq qalır. Onun sözlərinə görə, təkcə stansiyaya birbaşa zərbə endirilməsi ehtimalı deyil, həm də elektrik xətlərinin kəsilməsi riski var ki, bu da stansiyanın soyutma sistemini pozacaq və potensial olaraq nüvə qəzasına səbəb olacaq.
Dekabrın sonunda Qrossi Zaporojye AES yaxınlığındakı cəbhə xəttində Rusiya ilə Ukrayna arasında atəşkəs elan etdi. Müvəqqəti atəşkəs stansiyaya enerji təchizatını bərpa etmək üçün zəruri idi.
