1xeber.media xəbər verir ki,bu günlərdə “AzPolitika”da dərc olunan “Azərbaycanda bu şəxslər hər ay 140 manat müavinət ala bilərlər” başlıqlı yazı ilə bağlı redaksiyamıza oxucular tərəfindən çoxlu sayda suallar daxil olub. Oxucular müavinətin kimlərə təyin edilməsi, hansı sənədlərin tələb olunması ilə bağlı daha ətraflı məlumat verilməsini xahiş edirlər.
Xatırladaq ki, xəbərin mətnində qeyd olunur ki, ailə başçısını itirmiş və 18 yaşınadək əlilliyi müəyyən edilmiş, hazırda isə 18 yaşdan yuxarı əlilliyi olan şəxslər üçün dövlət tərəfindən sosial müavinət təyin edilir.
Mövzu ilə bağlı Dövlət Sosial Müdafiə Fonduna ünvanladığımız sorğuya cavab olaraq bildirilib ki, əslində bu müavinət yeni təyin edilmir, uzun müddətdir əhaliyə sosial dəstəyin bir hissəsi kimi ödənilir.
Belə ki, ailə başçısının itirilməsinə görə müavinət ailədə əmək qabiliyyəti olmayan və pensiya almayan şəxslərə sosial yardım göstərilməsi məqsədilə dövlət tərəfindən verilən aylıq pul vəsaitidir. Sözügedən müavinətin aylıq məbləği 140 manat təşkil edir.
Müavinət vəfat etmiş ailə başçısının aşağıdakı ailə üzvlərinə müəyyən müddətə təyin olunur:
-vəfat etmiş şəxsin 18 yaşına çatanadək uşaqlarına. Uşaq əyani təhsil aldıqda isə müavinət təhsilini başa vurana qədər, lakin 23 yaşdan çox olmamaqla ödənilir;
-vəfat etmiş şəxsin 18 yaşına çatanadək əlilliyi müəyyən olunmuş, 18 yaşından yuxarı əlilliyi olan uşaqlarına – əlillik müddəti ərzində;
-vəfat etmiş şəxsin 8 yaşınadək övladlarına baxan, yaşından və əmək qabiliyyətindən asılı olmayaraq işləməyən valideynlərdən, qardaş, bacı, baba və nənələrdən birinə – uşağın 8 yaşı tamam olana qədər.
Əsas şərt əlilliyin 18 yaşınadək müəyyən olunması və davam etməsidir.
Məlumata görə, müavinət plastik bank kartları vasitəsilə və yalnız nağdsız qaydada ödənilir.
Müavinət əldə etmək hüququ olan vətəndaşlar Dövlət Sosial Müdafiə Fondunun bölmələrinə, DOST xidmətinin şöbələrinə müraciət edərək sənədlərini təqdim etməlidirlər.
Qanunvericiliyə görə, bu sosial müavinət yalnız Azərbaycan vətəndaşlarına deyil, eyni zamanda ölkə ərazisində daimi yaşayış hüququ olan əcnəbilərə və vətəndaşlığı olmayan şəxslərə də şamil edilir.
Müavinətin təyin olunması üçün müraciət edən şəxsin şəxsiyyət vəsiqəsi, eləcə də ailə başçısının vəfatını təsdiq edən rəsmi sənəd tələb olunur. Ailə başçısı itkin düşmüş və ya ölmüş elan edilibsə, bu barədə məhkəmə qərarı təqdim edilməlidir. Müraciətin nümayəndə vasitəsilə edilməsi zamanı isə nümayəndənin səlahiyyətlərini təsdiqləyən etibarnamə və ya qəyyumluq sənədi də əlavə olunmalıdır.
Qanunvericiliyə əsasən, aşağıdakı hallardan biri baş verdikdə müavinətin ödənişi dayandırılır:
-müavinəti alan şəxs vəfat etdikdə, qanunvericiliklə müəyyən olunmuş qaydada itkin düşmüş və ya ölmüş elan edildikdə;
-uşağa qulluq edən şəxslərə münasibətdə uşağın 8 yaşı tamam olduqdauşaqlara münasibətdə uşağın 18 yaşı tamam olduqda, əyani təhsil alan uşaq isə təhsili başa vurduqda və ya 23 yaşı tamam olduqda;
-18 yaşından yuxarı uşağın əlillik müddəti bitdikdə.
