“Bakının Binəqədi rayonu, Xırdalan dairəsinin yaxınlığı, Səfəvilər küçəsində 10 gündən çoxdur su borusu partlayıb, içməli su boşuna axıb gedir”.
1xeber.media xəbər verir ki, bu şikayətlə “Qafqazinfo”ya həmin ərazidə yaşayan sakinlər müraciət edib.
Onların sözlərinə görə, küçəni su basmasın deyə yeri qazaraq axan suyu kanalizasiya xəttinə yönəldiblər: “Bir neçə ailənin içməli suyu günlərdir boş yerə axır. Evlərdə su yoxdur, artıq su daşımağa da çətinlik çəkirik. Dövlət xərc çəkib, əziyyətlə o suyu Bakıya gətirib çıxarıb, amma kiminsə səhlənkarlığı səbəbindən havayı axıb gedir. Dəfələrlə qaynar xəttə müraciət etsək də, neçə dəfə Binəqədi Rayon Sukanal İdarəsinə getsək də, problem həllini tapmır”.
Şikayətlə bağlı İri Şəhərlərin Birləşmiş Su Təchizatı Xidmətinə müraciət etdik. Qurumdan sorğumuza cavab olaraq bildirildi ki, hazırda problemin həlli istiqamətində iş görülür: “Qəzanı aradan qaldırmaq üçün qeyd olunan əraziyə Sukanal İdarəsinin əməkdaşları yönləndirilib. Yaxın 1-2 saat ərzində problem həll olunacaq”.
