Afrika Futbol Konfederasiyası (CAF) Mərakeş və Seneqal arasında keçirilən 2025-ci il Afrika Millətlər Kubokunun (AFCON) qalmaqallı final oyunu ilə bağlı sərt qərarlarını açıqlayıb.
1xeber.media xəbər verir ki, Seneqal millisinin baş məşqçisi Pape Tiau sərt şəkildə cəzalandırılıb. Qeyri-idman hərəkətləri və oyunun nüfuzuna xələl gətirməkdə təqsirli bilinən mütəxəssis 5 oyunluq diskvalifikasiya olunub və 100 min dollar məbləğində cərimələnib.
Ümumilikdə, final matçından sonra tərəflərə kəsilən cərimələrin məbləği 1 milyon dollara yaxındır.
Xatırladaq ki, Seneqal və Mərakeş milliləri arasında yanvarın 18-də Rabatda keçirilən həlledici final qarşılaşmasında xaos yaşanmışdı. Matçın sonlarına yaxın hakim Mərakeşin xeyrinə penalti təyin edib. Bundan qəzəblənən baş məşqçi P.Tiau komandasını meydandan çıxarıb. Oyun təxminən 17 dəqiqə dayanıb. Yalnız ulduz futbolçu Sadio Manenin komanda yoldaşlarını dilə tutmasından sonra Seneqal meydana qayıdıb. Brahim Diazın panenka üslubunda vurduğu penaltini qapıçı Eduar Mendi dəf edib və oyun Seneqalın 1: o hesablı qələbəsi ilə yekunlaşıb.
