İspaniyanın “Atletiko” (Madrid) klubu İtaliya “Atalanta”sının hücumçusu Ademola Lukmanın transferini rəsmiləşdirib.
1xeber.media Madrid təmsilçisinin mətbuat xidmətinə istinadən xəbər verir ki, tərəflər arasında 2030-cu ilə qədər nəzərdə tutulan uzunmüddətli müqavilə imzalanıb.
Bu keçid “Atletiko”ya 35 milyon avrosu sabit ödəniş, 5 milyon avrosu isə bonuslar olmaqla, ümumilikdə 40 milyon avroya başa gəlib.
Qeyd edək ki, 28 yaşlı nigeriyalı futbolçu 2022-ci ildən “Atalanta”da çıxış edirdi. O, Berqamo təmsilçisinin heyətində keçirdiyi 137 oyunda 55 qol və 27 məhsuldar ötürmə ilə yadda qalıb.
Məlumat üçün bildirək ki, Lukman xüsusilə 2024-cü ilin Avropa Liqasının finalında Leverkuzen “Bayer”inə vurduğu het-triklə komandasına tarixi çempionluq qazandırmışdı. Futbolçunun transferi üçün Türkiyənin “Fənərbaxça” klubu da ciddi cəhd göstərsə də, Lukman karyerasını La Liqada davam etdirməyə üstünlük verib.
