Almaniyanın "Hamburq" klubu intizam qaydalarını kobud şəkildə pozan futbolçusu Jan-Lük Dompeni sərt şəkildə cəzalandırıb.
1xeber.media xəbər verir ki, yanvarın sonunda sərxoş halda avtomobil idarə edərkən polis tərəfindən saxlanılan 30 yaşlı fransalı yarımmüdafiəçi ilə bağlı qərar verilib.
Klub rəhbərliyi oyunçu ilə görüş keçirərək ona klub tarixində rekord məbləğdə, altı rəqəmli cərimə kəsildiyini bildirib. Bununla yanaşı, Dompe növbəti qərara qədər Bundesliqa matçlarından kənarlaşdırılıb.
Futbolçu açıqlamasında əməlindən peşman olduğunu deyib:
"Başa düşürəm ki, quru üzr istəmək kifayət deyil. Mənə bəslənən ümidləri doğrultmadım, nümunəvi ola bilmədim. Ciddi səhvlərə yol verdim və nəticələrinə qatlaşacağam. Klubu, məşqçilər korpusunu və mənə dəstək olan azarkeşləri məyus etdiyim üçün çox üzgünəm. Komandamı belə vacib məqamdə tək qoyduğum üçün üzr istəyirəm".
Qeyd edək ki, ictimai işlərdə çalışacağını bildirən Dompenin bu həftə məşqlərə qayıtması gözlənilir. Klub onun vəziyyətini dəyərləndirdikdən sonra meydana dönüb-dönməyəcəyinə qərar verəcək.
