“Səbirə Muradova və oğlu Vüsal Muradov Şabran Rayon İcra Hakimiyyətinin başçısı Asif Hüseynova şər atırlar”.
1xeber.media xəbər verir ki,bunu “Yeni Sabah”a açıqlamasında Şabran Rayon İcra Hakimiyyəti başçısının müavini İlkin Ağayev deyib.
A.Hüseynovun Şabranın Uzunboyad kənd sakinləri S.Muradova və V.Muradovdan taxıl alıb pulunu verməməsi ilə bağlı xəbərlərə münasibət bildirən icra başçısının müavini deyib ki, belə bir hadisə olmayıb:
“Adıçəkilən şəxslər 2025-ci ildə məsələni gündəmə gətiriblər və Prezident Administrasiyasına, müxtəlif qurumlara şikayət ediblər. Onların iddiasına görə, guya məsələ 2019-cu ildə baş verib. Amma bu müddət ərzində bir dəfə də olsun İcra Hakimiyyətinə gəlməyiblər, icra başçısına müraciət etməyiblər, birbaşa yuxarı qurumlara şikayət yazıblar. 6 il bundan öncə olan bir hadisəni gündəmə gətirmək indi yadlarına düşüb? Kiməsə nəsə vermisən, 6 il sonra arxasınca gəlirsən? Onlar deyirlər ki, icra başçısı gəlib taxılımızı alıb apardı. Harada görünüb ki, icra başçısı hansısa kəndə taxıl almağa getsin. İcra başçısının o qədər işləri var. Sözügedən şəxslər birmənalı şəkildə Şabran Rayon İcra Hakimiyyətinin başçısı Asif Hüseynova böhtan atırlar”.
İlkin Ağayevin sözlərinə görə, icra başçısı Asif Hüseynov məsələ ilə bağlı məhkəməyə müraciət edib:
“Səbirə Muradova və oğlu Vüsal Muradova yalan məlumat yaymaqla Asif müəllimin işgüzar nüfuzuna xələl gətiriblər. Ona görə də onları xüsusi ititham qaydasında məhkəməyə verib. Şikayətə Xaçmaz Rayon Məhkəməsində baxılır. Yekun qərarı məhkəmə verəcək”.
İcra başçısının müavini şikayətin Şabran deyil, Xaçmaz məhkəməsinə verilməsi məsələsinə də aydınlıq gətirib: “Rayonun rəhbəri olduğuna görə Şabran Rayon Məhkəməsinə şikayət etmək doğru olmazdı. Həm də məlumatı yayan saytın ofisi Xaçmazda yerləşir”.
Qeyd edək ki, bu gün Xaçmaz Rayon Məhkəməsində Şabran Rayon İcra Hakimiyyətinin başçısı Asif Hüseynovun xüsusi ittiham qaydasında verdiyi şikayətə baxılacaq. İcra başçısı Şabranın Uzunboyad kənd sakinləri – 75 yaşlı təqaüdçü müəllimə Səbirə Muradova və oğlu Vüsal Muradovdan şikayətçidir.
Uzun illər Uzunboyad kənd məktəbində müəllimə işləyən Səbirə Muradova hazırda təqaüddədir. Ailə iddia edir ki, ümumi dəyəri 10 min 500 manat olan 15 ton toxumluq arpanı icra başçısına nisyə satıblar, lakin bu günədək pul ödənilməyib.
Mövzu ictimailəşdikdən sonra Asif Hüseynov Muradovların Cinayət Məcəlləsinin 147-ci maddəsi (böhtan) ilə cəzalandırılmasını tələb edir. İcra başçısını narazı salan əsas məqam onların mətbuat vasitəsilə borcun ödənilməməsi barədə açıqlama vermələri olub.
