Beynəlxalq futbolda maliyyə pozuntularına qarşı ciddi tədbirlər görülür. Məsələn, FİFA tərəfindən ayrılan vəsaitlərin mənimsənilməsi ilə bağlı qalmaqalda Konqo Futbol Federasiyasının sabiq prezidenti ömürlük, keçmiş baş katibi isə 5 il həbs cəzası alıb. Bu fakt göstərir ki, futbol qurumlarında maliyyə pozuntuları sübuta yetirilərsə, məsul şəxslər ciddi cəzalandırıla bilər.
Azərbaycanda isə Azərbaycan Futbol Federasiyaları Assosiasiyasında (AFFA) illərlə böyük məbləğdə vəsaitlərin mənimsənilməsi ilə bağlı iddialar səslənir. Uzun müddət quruma rəhbərlik etmiş Rövnəq Abdullayev və federasiyanın keçmiş baş katibi Elxan Məmmədov bu dövrdə əsas idarəedici şəxslərdən olublar.
AFFA-da mənimsəmə sübuta yetirilərsə, Rövnəq Abdullayev və Elxan Məmmədov məsuliyyətə cəlb oluna bilərmi?
Globalinfo.az-a danışan vəkil Mehman Muradlı deyib ki, AFFA qeyri-kommersiya təşkilatı olduğu üçün hər il maliyyə və fəaliyyət hesabatları təqdim etməlidir:
“Bildiyimə görə, xüsusilə də Rövnəq Abdullayevin rəhbərliyi dövründə bu hesabatların auditi beynəlxalq şirkətlər tərəfindən aparılırdı. Həmin audit prosesləri çərçivəsində müxtəlif maliyyə məsələləri, o cümlədən beynəlxalq futbol qurumları tərəfindən, xüsusilə FİFA tərəfindən ayrılan vəsaitlərin istifadəsi də yoxlanılırdı. Əgər bu vəsaitlərin mənimsənilməsi ilə bağlı hər hansı faktlar və ya sübutlar ortaya çıxarsa, məsələ artıq hüquqi müstəviyə keçir. Belə halda Azərbaycan hökumətinə müraciət olunmalı və məsələ Baş Prokurorluq səviyyəsində araşdırılmalıdır. Əgər mənimsəmə faktı təsdiq olunarsa, bu hal Azərbaycan Respublikasının Cinayət Məcəlləsinin mənimsəmə ilə bağlı maddələrinə uyğun olaraq qiymətləndirilir”.
Vəkil bildirib ki, cəzanın ağırlığı mənimsənilmiş məbləğin həcmindən asılıdır:
“AFFA kimi böyük maliyyə dövriyyəsi olan bir qurumda isə adətən iri məbləğlərdən söhbət gedir. Belə hallarda qanunvericilikdə nəzərdə tutulan sanksiya təxminən 10 ildən 15 ilə qədər azadlıqdan məhrumetmə cəzası ola bilər. Təbii ki, bu cür məsuliyyət yalnız mənimsəmə faktı tam sübut olunduğu halda tətbiq edilir.
Qanunvericiliyə görə, müəyyən hallarda dəymiş zərər tam ödənilərsə və əlavə olaraq zərərin müəyyən hissəsi dövlət hesabına qaytarılarsa, həmin şəxslərin cinayət məsuliyyətindən azad olunması da mümkündür”.
