NATO-nun Avropadakı Ali Müttəfiq Komandanı (SACEUR) Aleksus Qrinkeviç, İranın cənubundakı Minabda qızlar ibtidai məktəbinə edilən hücumda ABŞ-ın günahkar olduğunu inkar etdi.
1xeber.media xəbər verir ki, o, bu açıqlamanı Forbes-in YouTube kanalında yayımlanan Senat dinləmələri zamanı verdi.
"Karyeram boyunca mülki şəxslərə zərər verməmək üçün əlimdən gələni etmişəm. Deyərdim ki, buna tamamilə sadiq qalmışam. Bilirəm ki, Müdafiə Nazirliyi də eyni şeyi etməyə çalışır və bu kimi faciələr baş verdikdə, hamımızı düşünməyə və hərəkətlərimizi təkmilləşdirməyə çalışmağa məcbur edir", - deyə hərbi komandir bildirib.
Baş komandandan məktəbə edilən hücumun mümkün səbəbləri barədə də soruşulub, lakin o, birbaşa cavab verməkdən imtina edib. O, "adətən hava qəzasına bənzər bir sıra səhvlər baş verdiyini" bildirib və hadisəyə səbəb olan bütün amilləri müəyyən etmək üçün araşdırma aparılmalı olduğunu əlavə edib.
Daha əvvəl The New York Times qəzeti ilkin araşdırmaya istinadən bildirib ki, ABŞ qızlar ibtidai məktəbinə Tomahawk raket hücumuna görə məsuliyyət daşıyır.
Martın 10-da Rusiya Prezidenti Vladimir Putin iranlı həmkarı Məsud Pezeşkyanla bir həftə ərzində ikinci dəfə danışıb. Kreml Rusiya liderinin münaqişənin sürətlə azaldılması lehinə prinsipial mövqeyini bir daha təsdiqlədiyini vurğulayıb.
