BƏƏ hakimiyyəti ABŞ və İran arasındakı münaqişənin kəskinləşməsindən sonra ölkəni tərk edən ekspatları geri qaytarmaq üçün xarici vətəndaşlara vergi statusunu itirmədən xaricdə daha çox vaxt keçirməyə icazə verməyi planlaşdırır.
1xeber.media “Financial Times” (FT) nəşrinə istinadla xəbər verir ki, Birləşmiş Ərəb Əmirlikləri bu addımla ölkənin cəlbediciliyini qorumağa çalışır.
“Son hadisələr Dubayın təhlükəsizlik və müdafiə nöqteyi-nəzərindən bir şəhər kimi cəlbediciliyinə artıq zərər vurub. Şəhərin iqtisadiyyatı və imici üçün bu ekspatları saxlamaq son dərəcə vacib amildir” - deyə varlı miqrantlara məsləhət verən “BDO” şirkətinin vergi hüququ üzrə tərəfdaşı Elza Litvud bildirib.
Hüquqşünasın fikrincə, əgər ölkədən gedən ekspatlar “BƏƏ-də rezident statusunu itirsələr və Böyük Britaniyada əlavə vergilər ödəmək məcburiyyətində qalsalar, bu, Dubay üçün böyük riskdir”.
FT yazır ki, yüksək rütbəli məmurlar ümumi güzəştlərin verilməsinə tərəddüdlə yanaşsalar da, münaqişə bitdikdən sonra müraciətlərə fərdi qaydada baxılacağına dair əminlik verirlər.
