Bu səhər Çelyabinskdə Novorossiysk küçəsində yerləşən 32 saylı məktəbdə 15 yaşlı doqquzuncu sinif şagirdi sinif yoldaşlarına və müəllimə silahlı hücum edib.
1xeber.media yerli KİV istinadla xəbər verir ki,yeniyetmə hücuma əvvəlcədən hazırlaşıb - plastik arbalet alıb və onun atəş gücünü kustar üsulla artırıb. O, həmçinin qazlı, başqa məlumata görə isə bibər qazlı balon, eləcə də siqnal tapançası alaraq məktəbə gətirib.
Məktəbə daxil olduqdan və hücuma hazırlaşdıqdan sonra Artyom tualetə girib və uzun müddət orada qalıb. Şagirdlər bu barədə biologiya və əmək müəllimlərinə xəbər veriblər. Müəllimlər qapını döyərək ondan uzun oturmamağı xahiş ediblər. Buna cavab olaraq məktəbli qapını açıb və onları balondakı maye ilə püskürdüb, sonra silahı hazırlayaraq öz sinfinə yollanıb.
Daha sonra dərs zamanı o, tapançadan qarşısında oturan sinif yoldaşı qızın başına atəş açıb, həmçinin müəlliməyə arbaletdən atəş açıb. Hücum edən şəxsin hərəkətləri nəticəsində daha 2 nəfər yüngül xəsarət alıb. Zərərçəkənlərin həyatına təhlükə yoxdur.
Hücumdan sonra yeniyetmə pəncərədən tullanıb. O, 4-cü mərtəbədən yıxılarkən hər iki ayağını sındırıb, düşdüyü yerdəcə polis tərəfindən saxlanılıb, daha sonra xəstəxanaya yerləşdirilib.
Hücumun səbəbi kimi bullinq göstərilir - hücum edən şəxs sakit şagird olub, az dostu var idi, məktəbdən kənarda isə karate və şahmatla məşğul olurdu.
32 saylı məktəbdə bu gün üçün dərslər ləğv edilib, binada hüquq-mühafizə orqanlarının əməkdaşları çalışırlar. Hücuma məruz qalan sinfin uşaqları ilə psixoloqlar işləyir. Digər şagirdlər məktəbdən çıxarılaraq valideynlərinə təhvil verilib.
“İki və ya daha çox şəxsin qətlinə cəhd”, “Səhlənkarlıq” və “Vətəndaşların həyat və sağlamlığı üçün təhlükəsizlik tələblərinə cavab verməyən xidmətlərin göstərilməsi” maddələri ilə cinayət işləri açılıb. Hadisəyə yol verən məktəb əməkdaşları və rəhbərlik də daxil olmaqla məsul şəxslər cavab verəcəklər.
