ABŞ və İsrail İslam Respublikasının ən yüksək rütbəli rəsmilərini zərərsizləşdiriblər

Vaşinqtonun rejim daxilindəki “real nüfuz sahibi” ilə danışıqlar apardığı barədə xəbərlər fonunda, Qərb siyasi dairələri Tehranda yeni güclü liderin ortaya çıxdığı qənaətinə gəliblər.

1xeber.media-nın məlumatına görə,“The Telegraph” nəşri yazır ki, bu şəxs bir çoxlarının düşündüyü kimi İran parlamentinin spikeri Məhəmməd Baqer Qalibaf deyil, İslam İnqilabı Keşikçiləri Korpusunun (SEPAH) yeni baş komandanı, Xameneyi mütləqiyyətinin tərəfdarı Əhməd Vahididir.

Vahidi rejimin hərbi, kəşfiyyat və bürokratik strukturlarında bənzərsiz təcrübəyə və təsir imkanlarına malikdir. 2005-ci ildə SEPAH ilə əlaqəli olan Mahmud Əhmədinejad prezident vəzifəsini tutduqda, hökumətin qapıları Vahidinin üzünə açıldı. O, həmçinin dövlət bürokratiyasının hərbiləşdirilməsinin əsas təşəbbüskarlarından biri olub.

Lakin Vahidinin oynadığı ən mühüm rol indiyədək xarici aləmə demək olar ki, məlum deyil. 2018-ci ildə Vahidi İranın “Ali Milli Müdafiə Universiteti”nin rəhbəri təyin edilib və mərhum ali rəhbər Əli Xameneyi ona islamçı teokratiyanın tam hərbiləşdirilməsi planını hazırlamağı tapşırıb.

Yayılan rəylərin əksinə olaraq, Vahidi İranın yeni ali rəhbəri Müctəba Xameneyinin nüfuzuna xələl gətirmir, əksinə, müharibə dövründə onun hakimiyyətini qorumaq üçün ən uyğun simalardan biri hesab olunur. Üzərində siyasi yük daşıyan və sistem daxilində çoxsaylı rəqibləri olan Məhəmməd Baqer Qalibafdan fərqli olaraq, Vahidi SEPAH-da böyük etimada və güc strukturlarında geniş nüfuza sahibdir. Bu amil onu ictimai ehtimalların xaricində daha əhəmiyyətli fiqura çevirir. O, sadəcə növbəti bir komandir deyil; bəlkə də digərləri Tehranda tanınmış simalar axtardığı bir vaxtda, sistemi dağılmaqdan qoruyan məhz odur.

“Məhz buna görə də müharibəni indi dayandırmaq ciddi səhv olardı. Kampaniyanın davam etdirilməsinin qısamüddətli zərərləri realdır, lakin bu rejimin indiki formada qalmasının uzunmüddətli fəsadları daha ağır ola bilər. Müctəba Xameneyi və Əhməd Vahidi tərəfindən dəstəklənən sistem daha ehtiyatlı və ya praqmatik olmayacaq; o, daha sərt, hərbiləşdirilmiş və təhlükəli hala gələcək. Bu, islamçı Şimali Koreyanı xatırladacaq. Ona görə də sual artıq İslam Respublikasının bu müharibədən sağ çıxıb-çıxmayacağı deyil, sağ qalacağı təqdirdə hansı rejimin mövcud olacağıdır – bu isə hər kəsi narahat etməlidir” - deyə nəşr qeyd edir.