Kreml sahibi Vladimir Putin ilin yekunları ilə bağlı keçirdiyi mətbuat konfransında bildirib ki, Rusiya Suriyada ümumilikdə öz məqsədlərinə nail olub.
Bu barədə politoloq Elxan Şahinoğlu qeyd edib.
Politoloq Putinin “Suriyaya ona görə getmişik ki, orada başqa ölkələrdə, Əfqanıstanda yaradılan kimi terror anklavı yaranmasın. Ümumilikdə qarşıya qoyduğumuz məqsədlərə nail olduq” fikrinə vurğu edib:
“Birincisi, bu cümlədə Əfqanıstanla paralel aparılması diqqət çəkir. Putinin təbirincə desək, Əfqanıstanda “terror anklavı” yaradılıbsa, Kreml bu “anklavı” yaradan Talibanla niyə təmas qurub, bu təşkilatı terrorçu siyahısından çıxarmağa qərar verib? İkincisi, Rusiya Suriyada necə məqsədinə nail olub ki, Putin sonrakı cümləsində ölkəsinin Suriyada hərbi bazalarının saxlanılıb-saxlanılmamasıyla bağlı hələ qərar vermədiyini söyləyir? Rusiya Suriyada məqsədinə nail olsaydı, həmin iki hərbi baza ətrafında qeyri-müəyyənlik yaranmazdı.
Əlbəttə, Rusiyanın əsas məqsədlərindən biri Suriyada İŞİD terrorçularını zəiflətmək idi, buna müəyyən qədər nail olundu, ancaq digər əsas məqsədi Əsəd rejimini qorumaq idi. İkinciyə nail olunmadı. Demək, bu halda Rusiyanın Suriyada məqsədinə nail olduğunu iddia etmək çətindir”.
axar.az
