“Taksi problemləri üzrə mütəxəssis olmağıma çox az qalıb. Taksinin çox yox, 2 ay əvvəl qiymətləri 2.50-ni keçmirdi. Ən ucuzu da Yango idi. Məsafə nə qədər uzaq olurdusa, Qiymət də münasib olurdu. Pəh… Sürücülər də xoşbəxt idi, sərnişinlər də”.
1xeber.media xəbər verir ki, bu sözləri tanınmış jurnalist İradə İsaq deyib.O daha sonra fikrini belə davam etdirib:
“Şamaxinkadan “Azərpoçt”a taksi sifariş etmişəm. Həmişə 4.50 manat göstərən “Yango” 6.10 manat yazdı. Dedim, olsun. Təki vaxtında çatım. Sürücü məni yığıb nə desə, yaxşıdır? “Bacım, ucuzdur ey, təcili deyilsə, bəlkə getməyək?”. Dedim, anlamadım. Şəhərə düşəcəm, ucuzdur? Deyirəm, dünənə qədər 4.50-yə getdiyiniz yolu günorta tıxacsız 6.10-a qəbul etmək istəmirsiniz? Deyir, bizə tapşırıblar ki, danış, qiymət sərf etmirsə, getmə, ləğv elə.
Hələ “Bolt”u demirəm. Deməli, ən ucuzu 5.90-a gəlir. Daha onlar da gəlmir, vadar edir səni ki, komfort, biznes vurasan. Nə sirrdirsə, onları sifariş edən kimi gəlirlər. Bəhanə də budur ki, maşın azalıb. Anlamadım, maşın azalıb, Komfort çoxalıb?
Anlayıram ey, hərəniz bir cür başımızı qırxırsınız. Yaxşı da edirsiniz. Bizə bu da azdır.
Şikayət etmirəm ha, tövbə. Sadəcə deyirəm ki, o fildən birini də göndərin. Belə ürəyimiz tez partlamır.
