Azərbaycanda idarəetmə və icra intizamının gücləndirilməsi məqsədilə fəaliyyətində nöqsanlara yol verən yüksək çinli məmurların intizam məsuliyyətinə cəlb edilməsi təcrübəsi mövcuddur. Əmək Məcəlləsinin 186-cı maddəsinə əsasən, işçilərə pozuntunun dərəcəsindən asılı olaraq töhmət, sonuncu xəbərdarlıqla şiddətli töhmət, maaşın dörddə birindən çox olmamaqla cərimə və ya əmək müqaviləsinə xitam verilməsi kimi intizam tənbehləri tətbiq edilə bilər. Təcrübə göstərir ki, dövlət rəhbərliyi tərəfindən elan edilən töhmətlər məmurların gələcək karyerasına birbaşa təsir göstərir.
1xeber.media Modern.az-a istinadən indiyədək xidməti fəaliyyətindəki nöqsanlara görə rəsmi şəkildə töhmət və ya şiddətli töhmət alan tanınmış məmurların siyahısını təqdim edir:
Oqtay Şahbazov - 21 avqust 2017-ci il
2016-cı il yanvarın 15-dən Azərbaycan Respublikası Prezidentinin İşlər müdiri vəzifəsində çalışan Oqtay Qəşəm oğlu Şahbazov xidməti vəzifələrinin icrası zamanı yol verdiyi nöqsanlara görə dövlət başçısı İlham Əliyevin sərəncamı ilə töhmət alıb. O, 2021-ci il yanvarın 26-da sözügedən vəzifədən azad edilib.
Nahid Bağırov - 21 aprel 2020-ci il
2020-ci il martın 5-də İsmayıllı Rayon İcra Hakimiyyətinin başçısı təyin olunan Nahid Rza oğlu Bağırov rəhbərliyindən qısa müddət sonra intizam tənbehinə məruz qalıb. O, ölkə ərazisində koronavirus (COVID-19) infeksiyasının yayılmasının qarşısını almaq məqsədilə tətbiq edilən xüsusi karantin rejimi qaydalarını pozduğuna görə Prezidentin sərəncamı ilə töhmət alıb.
Rövşən Məmmədov - 17 iyun 2021-ci il
2019-cu il sentyabrın 4-dən “Azərbaycan Televiziya və Radio Verilişləri” QSC-nin (AzTV) sədri vəzifəsini icra edən Rövşən Raqifoğlu Məmmədov xidməti fəaliyyətində qeydə alınan ciddi nöqsanlara görə dövlət başçısının sərəncamı ilə şiddətli töhmətlə cəzalandırılıb.
Anar Tağıyev və Alı Alıyev - 13 may 2022-ci il
Prezident İlham Əliyevin imzaladığı sərəncamla eyni gündə iki rayonun icra başçısına töhmət verilib. İşində nöqsanlara yol verdiyi üçün 2019-cu il oktyabrın 31-dən Yevlaxın idarəçisi olan Anar Aqil oğlu Tağıyev və 2011-ci il fevralın 25-dən Füzuliyə rəhbərlik edən Alı Nağı oğlu Alıyev töhmət alıblar.
Balababa Rzayev - 5 oktyabr 2024-cü il
2018-ci il sentyabrın 4-dən “Azərenerji” ASC-nin prezidenti vəzifəsini daşıyan Balababa Hüseynağa oğlu Rzayev dövlət başçısının sərəncamı ilə şiddətli töhmət alıb. Baş energetik bu cəzaya həmin il üçün təsdiqlənmiş yanacaq-enerji balansında qazdan istifadə istiqamətlərini pozaraq, müvafiq qaydada razılaşdırma aparmadan elektrik enerjisini ixrac etdiyinə görə məruz qalıb.
Fuad Nağıyev - 4 mart 2025-ci il
2018-ci il aprelin 23-dən Dövlət Turizm Agentliyinin sədri postunu tutan Fuad Hümbət oğlu Nağıyev rəsmi sərəncamla cəzalandırılıb. O, rəhbərlik etdiyi sahədə və işində yol verdiyi qüsurlara görə Prezident tərəfindən şiddətli töhmət alıb.
Orxan Hüseynzadə - 28 avqust 2025-ci il
2024-cü il noyabrın 1-də Ağdaş Rayon İcra Hakimiyyətinin başçısı təyin edilən Orxan Rövşən oğlu Hüseynzadə fəaliyyətinin ilk ili tamam olmamış intizam məsuliyyətinə cəlb edilib. İcra başçısı işində yol verdiyi ciddi nöqsanlar səbəbindən ölkə rəhbərinin sərəncamı ilə şiddətli töhmət alıb.
Adil Əliyev - 17 fevral 2026-cı il
Fəaliyyətindəki nöqsanlara görə ictimaiyyətə açıqlanan ən sonuncu töhmət hadisəsi Suraxanı Rayon İcra Hakimiyyətinin başçısı Adil Abış oğlu Əliyevlə bağlıdır. 2024-cü il iyulun 8-dən rayona rəhbərlik edən A.Əliyevə bu intizam tənbehi Bakı Şəhər İcra Hakimiyyətinin başçısı Eldar Əzizov tərəfindən elan edilib. Buna səbəb kimi Suraxanı rayonunda qeydə alınan sanitar təmizlik problemləri və bəzi qəsəbələrin paytaxt standartlarından geri qalması göstərilib.
