Paytaxtın daşınmaz əmlak bazarında, xüsusən də kirayə mənzil sektorunda son aylarda görünməmiş bir canlanma və qiymət artımı müşahidə olunur. Əvvəllər bu cür kəskin artımlar yalnız avqust-sentyabr aylarında, universitetlər açılanda baş verirdisə, indi yay mövsümünün ortasında artıq mərkəzə yaxın ərazilərdə normal kirayə ev tapmaq demək olar ki, qeyri-mümkünə çevrilib.
1xeber.media-nın əməkdaşının apardığı qısa müşahidələr göstərir ki, bazarın bu cür süni şəkildə şişməsinə həm şəhərdə sökülən köhnə binaların sakinlərinin kirayə bazarına daxil olması, həm də bəzi vasitəçilərin (maklerlərin) onlayn platformalarda qiymətləri qəsdən qaldırması səbəb olur. Nəticədə bölgələrdən Bakıya gələn tələbələr və gənc ailələr gəlirlərinə uyğun mənzil tapa bilmirlər.
Daşınmaz əmlak üzrə ekspertlərin ümumi rəyinə görə, Azərbaycanda kirayə mənzil bazarının hüquqi tənzimlənməsi və tərəflər arasında rəsmi müqavilələrin bağlanması mexanizmi hələ də zəifdir. Mütəxəssislər bildirirlər ki, qiymətlərin vətəndaşların alıcılıq qabiliyyətinə uyğunlaşdırılması üçün uzunmüddətli sosial mənzil layihələrinin və tələbə yataqxanalarının sayının artırılması qaçılmazdır. Bu sahədə şəffaflığın təmin olunması həm də qeyri-qanuni pul dövriyyəsinin qarşısını alacaq ən mühüm amildir.
