IV ixtisas qrupu üzrə ali təhsil müəssisələrinə qəbul imtahanlarının nəticələri və formalaşan müsabiqə vəziyyəti geniş müzakirə olunur. Bu il ən çox tələb olunan tibb və digər nüfuzlu ixtisaslarda keçid ballarının yüksək olacağı, müsabiqənin əsasən 600 baldan yuxarı nəticə göstərən abituriyentlər arasında gedəcəyi gözlənilir.
Təhsil eksperti Elçin Əfəndi mövzu ilə bağlı 1xeber.media-ya bildirib ki, bu il ali təhsil müəssisələrinin IV ixtisas qrupu üzrə müsabiqədə iştirak edən abituriyentlərin sayı ötən illə müqayisədə demək olar ki, eyni səviyyədədir:
“Lakin builki qəbul prosesində yüksək nəticə göstərən abituriyentlərin sayı artıb. Bu isə müsabiqənin daha rəqabətli keçəcəyini göstərir. Xüsusilə tibb, tədrisi ingilis dilində olan tibb proqramları, Azərbaycan və rus bölmələri, stomatologiya, biotexnologiya və digər səhiyyə yönümlü ixtisaslar üzrə rəqabətin daha gərgin olacağı gözlənilir. Belə bir rəqabət mühitinin formalaşması həmin ixtisaslar üzrə keçid ballarının da yüksəlməsi ehtimalını artırır. Bu il keçid ballarında müəyyən dəyişikliklərin baş verməsi gözlənilir”.
O deyib ki, bəzi ali təhsil müəssisələrində yeni ixtisasların açılması da keçid ballarına təsir göstərə bilər:
“Məsələn, Azərbaycan Dövlət Neft və Sənaye Universitetində biotexnologiya, Qarabağ Universitetində isə stomatologiya ixtisasının açılması həmin istiqamətlər üzrə keçid ballarının ötən illə müqayisədə sabit qalması ehtimalını artırır. Lakin ümumi mənzərə göstərir ki, builki qəbul prosesində ən yüksək rəqabət məhz tibb ixtisasında müşahidə olunacaq. Bu səbəbdən də tibb ixtisası üzrə keçid ballarında artımın baş verməsi daha real görünür”.
Aysel Elnur
