Rusiya Dövlət Dumasının Müdafiə Komitəsinin üzvü Andrey Kolesnik Ukraynanın Qara dəniz sahil zolağının tam şəkildə atəş nəzarətinə götürülməsinin zəruri olduğunu bildirib.
1xeber.media xəbər verir ki, deputat bu barədə Gazeta.Ru nəşrinə müsahibəsində danışıb.
Onun sözlərinə görə, bu addım Qərb ölkələrindən Odessa və Çornomorsk limanları vasitəsilə həyata keçirilən silah və sursat tədarükünə nəzarəti təmin etmək məqsədi daşıyır.
“Bütün sahil xətti nəzarət altında olmalıdır. Düşünürəm ki, qoşunlarımız artıq buna nail olub. Sahil zolağı tam şəkildə atəş altında saxlanılmalıdır”, – deyə Kolesnik bildirib.
Məlumata görə, Rusiya Silahlı Qüvvələri son dövrlərdə Ukraynanın liman infrastrukturuna zərbələri davam etdirir. Rusiya tərəfi iyulun 30-na keçən gecə Yujnı limanında bir yük gəmisini, həmçinin Odessa yaxınlığında daha iki yük gəmisini vurduğunu və həmin gəmilərin silah və hərbi yüklər daşıdığını iddia edib.
Andrey Kolesnik bildirib ki, son kütləvi zərbələrin əsas məqsədi Ukraynanın logistika marşrutlarını pozmaq və silah istehsalı imkanlarını zəiflətməkdir.
Qeyd edək ki, bu məlumatlar və iddialar Rusiya tərəfinin açıqlamalarına əsaslanır. Ukrayna tərəfi hadisələrlə bağlı fərqli mövqe bildirə bilər və məlumatlar müstəqil mənbələr tərəfindən tam təsdiqlənməyib.
