Rusiya Müdafiə Nazirliyi Ukrayna ərazisində həyata keçirilən son zərbələrin hədəfləri ilə bağlı məlumat yayıb.
1xeber.media xəbər verir ki, nazirliyin açıqlamasına əsasən, hücumlar Ukrayna Silahlı Qüvvələrinin istifadə etdiyi yanacaq-enerji və nəqliyyat infrastrukturuna yönəlib.
Bildirilib ki, zərbələr zamanı silah, sursat və yanacaq anbarları, pilotsuz uçuş aparatlarının istehsal sexləri və saxlanma məntəqələri də hədəfə alınıb.
Rusiya Müdafiə Nazirliyi həmçinin “Peçora” zenit-raket kompleksinin buraxılış qurğusunun məhv edildiyini iddia edib.
Məlumata görə, hücumlar əməliyyat-taktiki aviasiya, zərbə tipli pilotsuz uçuş aparatları, raketlər və artilleriya vasitəsilə həyata keçirilib.
Bundan əvvəl Rusiya Müdafiə Nazirliyi Silahlı Qüvvələrinin son sutkada Sumı vilayətində Moqritsa və Malaya Slobodka, Xarkov vilayətində Yurçenkovo, eləcə də Donetsk vilayətində Krasnoyarskoye yaşayış məntəqələrinə nəzarəti ələ keçirdiyini açıqlamışdı.
Qeyd edək ki, bu məlumatlar Rusiya Müdafiə Nazirliyinin açıqlamasına əsaslanır və müstəqil mənbələr tərəfindən təsdiqlənməyib. Ukrayna tərəfi hadisələrlə bağlı fərqli məlumat təqdim edə bilər.
