Müasir dövrdə beynəlxalq festivallar artıq yalnız musiqi, incəsənət və ya folklor tədbirləri olmaqdan çıxaraq xalqları bir-birinə yaxınlaşdıran, ortaq dəyərləri yaşadan və mədəni diplomatiyanı gücləndirən mühüm platformalara çevrilib. Xüsusilə Türk dünyasını birləşdirən ortaq tarix, dil, mədəniyyət və mənəvi irs fonunda keçirilən festivallar qardaş xalqlar arasında qarşılıqlı etimadın möhkəmlənməsinə, humanitar əməkdaşlığın genişlənməsinə və ortaq kimlik şüurunun güclənməsinə əhəmiyyətli töhfə verir.
Bu sözləri Əlişir Nəvai adına Daşkənd Dövlət Universitetinin, Oksford Akademiyasının, Türk Dünyası Beynəlxalq Elmlər Akademiyasının və "Vektor" Beynəlxalq Elmlər Akademiyasının fəxri professorudur. Bununla yanaşı, Özbəkistan Beynəlxalq Ədəbiyyat, Sənət və İctimai Fənlər Akademiyasının fəxri akademiki Xuraman Muradova bildirib.
Muradova qeyd edib ki,Azərbaycanın son illərdə ev sahibliyi etdiyi beynəlxalq festivallar, o cümlədən Qəbələ Beynəlxalq Musiqi Festivalı, Milli Yaylaq Festivalı və digər mötəbər mədəniyyət tədbirləri göstərir ki, ölkəmiz Türk dünyasının mədəni inteqrasiyasına töhfə verən əsas mərkəzlərdən birinə çevrilib. Bu tədbirlərdə müxtəlif türk dövlətlərindən və icmalarından gələn sənət adamlarının, alimlərin, gənclərin və yaradıcı kollektivlərin bir araya gəlməsi ortaq dəyərlərin qorunması və gələcək nəsillərə ötürülməsi baxımından böyük əhəmiyyət daşıyır.
Mədəniyyət xalqları bir-birinə bağlayan ən güclü körpüdür. Siyasi və iqtisadi əməkdaşlığın dayanıqlı olması üçün xalqlar arasında mənəvi yaxınlıq da vacibdir.
Məhz festivallar bu yaxınlığın formalaşmasına xidmət edir. Bir səhnədə səslənən ortaq musiqi, nümayiş olunan milli rəqslər, qədim sənət nümunələri və folklor ənənələri türk xalqlarının eyni kökdən gələn zəngin mədəni irsini bütün dünyaya nümayiş etdirir.
Bu cür beynəlxalq tədbirlər gənc nəslin milli-mənəvi dəyərlərə bağlılığını artırmaqla yanaşı, onların Türk dünyasının ortaq tarixi və mədəniyyəti haqqında biliklərini də zənginləşdirir. Gənclər müxtəlif ölkələrdən olan həmyaşıdları ilə tanış olur, ortaq layihələr hazırlayır, dostluq əlaqələri qurur və gələcək əməkdaşlığın təməlini formalaşdırırlar. Bu isə Türk dünyasının gələcəyinə qoyulan ən qiymətli sərmayələrdən biridir.
Festivallar həm də mədəni diplomatiyanın ən təsirli vasitələrindəndir.
Dövlətlər arasında qarşılıqlı etimadın möhkəmlənməsində, turizmin inkişafında, milli irsin tanıdılmasında və ölkələrin beynəlxalq imicinin gücləndirilməsində onların rolu əvəzsizdir. Azərbaycanın bu istiqamətdə qazandığı uğurlar ölkəmizin regionda sülhü, əməkdaşlığı və mədəni həmrəyliyi təşviq edən etibarlı tərəfdaş olduğunu bir daha təsdiqləyir.
Türk dünyasının inteqrasiyası yalnız siyasi qərarlarla deyil, həm də insanların qəlbində formalaşan ortaq mənəvi bağlarla möhkəmlənir. Həmin bağları isə ən təsirli şəkildə mədəniyyət, incəsənət və festivallar yaradır. Çünki musiqinin, sözün və sənətin dili tərcüməyə ehtiyac duymur; o, insanları bir-birinə yaxınlaşdırır, qarşılıqlı hörmət və etimad yaradır.
Bu gün Türk dünyasının qarşısında duran əsas vəzifələrdən biri ortaq mədəni irsi daha sistemli şəkildə qorumaq, birgə festivalların coğrafiyasını genişləndirmək və bu tədbirləri yeni əməkdaşlıq layihələrinin başlanğıc nöqtəsinə çevirməkdir. Mədəniyyət sahəsində qurulan əməkdaşlıq gələcəkdə elm, təhsil, innovasiya, iqtisadiyyat və digər istiqamətlərdə əlaqələrin daha da inkişafına möhkəm zəmin yaradır.
Beynəlxalq festivallar bir daha göstərir ki, Türk dünyasının ən böyük sərvəti onun zəngin mədəni irsi, ortaq tarixi yaddaşı və sarsılmaz qardaşlıq ruhudur. Bu ruh yaşadıqca Türk dünyasının birliyi daha da möhkəmlənəcək, ortaq mədəni məkan isə yeni uğurlarla zənginləşəcək. Azərbaycanın ev sahibliyi etdiyi belə mötəbər tədbirlər də bu böyük ideyanın həyata keçirilməsinə mühüm töhfə verməyə davam edəcək.
