Rusiya ABŞ-la müqayisə oluna biləcək taktiki nüvə silahı ehtiyatına malikdir. Buna görə də Vaşinqtonun yeni nüvə doktrinasına bu silahdan istifadə ilə bağlı müddəa əlavə etmək cəhdi Moskva və Pekinlə silahlanma yarışını daha da sürətləndirəcək. Bu barədə Silahlara Nəzarət Assosiasiyasının (ACA) icraçı direktoru Dəril Kimbal bildirib.
1xeber.media xəbər verir ki, ekspertin sözlərinə görə, Pentaqon rəhbərinin müavininin son açıqlamaları taktiki nüvə müharibəsi təhlükəsini daha da gündəmə gətirir.
"Bu bəyanatlar Çin və digər ölkələrlə taktiki nüvə müharibəsi riskinə diqqəti daha da artırır", – deyə Kimbal bildirib.
O vurğulayıb ki, Vaşinqtonun atdığı addımlar beynəlxalq vəziyyəti daha da gərginləşdirəcək. Kimbalın fikrincə, Rusiya və Çin ABŞ-a müqayisə oluna biləcək cavab vermək üçün kifayət qədər taktiki nüvə silahına malikdir. Bu səbəbdən o, tərəfləri silahların məhdudlaşdırılması ilə bağlı danışıqları bərpa etməyə çağırıb.
Xatırladaq ki, Rusiya Prezidenti Vladimir Putin ötən il bəyan etmişdi ki, Moskva Strateji Hücum Silahlarının Məhdudlaşdırılması Müqaviləsinin (START-3) müddəti başa çatdıqdan sonra da bir il ərzində onun məhdudiyyətlərinə könüllü şəkildə əməl etməyə hazırdır. Müqavilənin müddəti 5 fevral 2026-cı ildə başa çatıb. Lakin ABŞ tərəfi bu təklifə cavab verməyib.
