Əməkdar jurnalist Tofiqəxanım Qasımova (Nurani) Azərbaycan mətbuatında nadir analitik imza idi.
Bunu Medianın İnkişafı Agentliyinin İcraçı direktorunun müavini Natiq Məmmədli Əməkdar jurnalist Nuraninin vida mərasimində çıxış edərkən deyib.
N.Məmmədli diqqətə çatdırıb ki, mətbuatda xanım jurnalistlər müxtəlif mövzularda yaxşı publisistik məqalələr yazırlar:
"Amma analitika sahəsində xanım imzalar çox nadir rast gəlinir. Nurani məhz belə nadir imza idi. O və valideynləri uzun illər "Zerkalo" qəzetində çalışıblar. Azərbaycanın rusdilli mətbuatında intellektual jurnalist dedikdə Nurani və onun valideynləri, o cümlədən onların açdığı yolla gedən gənc jurnalistlər yada düşür. Bizdən sonra bu dünyada, sözümüz, imzamız qalır. Nurani həqiqətləri yazırdı. Əminik ki, Nuraninin sözü də, imzası da Azərbayacn mətbuatında həmişə qalacaq. Onu həmişə xatırlayacağıq".
Daha sonra "Qanun" Nəşrlər Evinin sahibi Şahbaz Xuduoğlu və "Yeni Müsavat" media qrupunun rəhbəri Rauf Arifoğlu Nurani haqqında xatirələrini bölüşüblər.
Rauf Arifoğlu Nuraninin müalicə xərclərini qarşıladığına görə Azərbaycanın Birinci vitse-prezidenti Mehriban Əliyevaya təşəkkür edib.
Qeyd edək ki, Nurani avqustun 22-si 56 yaşında uzun sürən xəstəlikdən sonra müalicə aldığı xəstəxanada vəfat edib. (report)
