Avqustun 24-də Bakı Dövlət Universitetində (BDU) hüquqşünaslıq ixtisası üzrə keçirilən təkrar ali təhsil imtahanında iştirak edən bir qrup namizəd redaksiyamıza müraciət edib. Şikayətçilər imtahan prosesində hüquqlarının ciddi şəkildə pozulduğunu bildirərək, səslərinin aidiyyəti qurumlara çatdırılması üçün 1xeber.media informasiya portalı vasitəsilə ictimaiyyətə müraciət ünvanlayıblar.Namizədlərin 1xeber.media-ya təqdim etdiyi şikayət mətnini olduğu kimi təqdim edirik:
“24 avqust 2026-cı il tarixində Bakı Dövlət Universitetində hüquqşünaslıq ixtisası üzrə təkrar ali təhsil imtahanı keçirilib. Lakin sözügedən imtahana uzun zamandır yüksək əzm və iradə ilə hazırlaşmağımıza baxmayaraq, imtahan prosesi, suallar və yaradılan şərait hüquqlarımızın ciddi şəkildə pozulmasına səbəb oldu.
Media vasitəsilə ictimaiyyətə çatdırmaq istəyirik ki, imtahan nə obyektiv, nə də ədalətli təşkil olundu. Suallar təsdiq olunmuş proqramdan kənar və həddindən artıq mürəkkəb idi. Xüsusilə tarix fənninə aid sualların mənbəsi yoxdur. Suallar subyektiv yanaşmalara əsaslanmış və biliklərimizi ədalətli qiymətləndirməyə imkan verməmişdir.
Eyni zamanda, 100 suala ayrılan 2 saat vaxt qətiyyən adekvat deyil. Ağır sualları həll etmək və cavab kartına düzgün kodlaşdırmaq bu qısa zaman çərçivəsində sadəcə mümkünsüz idi. İmtahan otaqlarında havalandırma sisteminin olmaması, yaxınlıqdakı binanın tikintisi zamanı gələn kənar səslər, nəzarətçilərin aqressiv yanaşmaları imtahan şəraitini daha da ağırlaşdırdı.
Əlavə olaraq, illik təhsil haqqının ötən ilə nisbətən artmasına baxmayaraq, biz məhz Vətənimizdə oxumaq istəyirik. Lakin bu cür maneələr istəyimizə mane olur. Gənclərin kütləvi şəkildə xaricə üz tutmasının əsas səbəbi məhz bu cür sərt qaydalardır. Bu gün 7600 manat təhsil haqqı ödəyərək xaricədə imtahansız oxumaq mümkün olsa da, biz ölkəmizi seçdiyimiz halda qarşımıza çıxan bu maneələr yerli təhsilə olan inamımızı kökündən sarsıdır.
Cari ildə keçirilən magistratura imtahanında abituriyentlərin haqlı şikayətləri nəzərə alındığı kimi, inanıram ki, bizim də səsimiz eşidiləcək.
Aidiyyəti qurumlardan nəticələrin və sualların qanunvericiliyə uyğun şəkildə araşdırılmasını xahiş edirik. Eyni zamanda, dözülməz şərait və sualların həddindən artıq ağırlığı nəzərə alınaraq, bal hesablanmasında keçid balının mümkün qədər maksimum səviyyədə aşağı enməsini xahiş edirik ki, bu qədər haqsızlıq və əziyyətdən sonra az bal toplasaq belə, çəkdiyimiz zəhmətin, bu çətin şərtlərdə qazanılan əməyin qarşılığını görək.”
