Belçikanın Xarici İşlər naziri Maksim Prevo ABŞ-nin ölkədəki səfiri Bill Uaytı nazirliyə çağıraraq diplomatdan sosial şəbəkələrdə belçikalı rəsmilərə qarşı hücumları dayandırmağı tələb edib.
1xeber.media xəbər verir ki, bu barədə “Politico” nəşri məlumat yayıb.
Belçikalı nazir amerikalı diplomata xəbərdarlıq edib ki, növbəti təxribatlar iki ölkə arasındakı münasibətlərin pisləşməsinə gətirib çıxara bilər:
“Hər hansı növbəti təxribat əks-effekt verəcək və münasibətlərimizdə lüzumsuz gərginliyə səbəb ola bilər”.
Qeyd edək ki, XİN rəhbərinin diplomatı çağırılmasına səbəb səfirin sosial şəbəkədə Belçikanın səhiyyə naziri Frank Vandenbrukun süni intellektlə hazırlanmış fotosunu paylaşması olub. Belə ki, fotoda nazir siqaret qutusunun üzərində təsvir olunub və “Vandenbruk. Həyatın bütün sevinclərini məhv edir” sözləri yazılıb. Səfir paylaşıma “Belçikanın ən böyük uğursuzu kimdir?” şərhini əlavə edib. Prevo səfirin hökumət üzvünə qarşı bu cür təhqiramiz ifadələr işlətməsinin yolverilməz olduğunu vurğulayıb.
