Bakıda gənc rəssam Kəmalə Cəfərovanın “L'Arte di Vivere” (“Yaşamaq da sənətdir”) adlı fərdi sərgisi təşkil edilib.
1xeber.media qafqazinfo-ya istinadən xəbər verir ki, xəbər verir ki, sərgi ziyarətçilərə estetik italyan üslubunda çəkilən rəsmlərlə tanış olmaq imkanı yaradıb.
Londonda təhsil alan və hazırda yaradıcılığını Moskvadakı emalatxanasında davam etdirən Kəmalə Cəfərovanın sözlərinə görə, bu sərgidəki kolleksiyanın əsas mesajı hər bir problemin keçib getdiyini və həyata olan sevginin heç vaxt itməməli olduğunu unutmamaqdan ibarətdir.
Beş yaşından rəsm çəkən K.Cəfərovanın təsvir etdiyi obrazlarda qocalıq həyatın son mərhələsi deyil, əksinə yaşamın ən dolğun, ən rəngli və ən sərbəst dönəmi kimi təqdim edilir.
Kəmalənin təsvir etdiyi qəhrəmanlar qocalmır, onlar rəqs edir, çimərlikdə günəşlənir, həyatdan zövq almağa davam edirlər. Gənc rəssamın fəlsəfəsinə görə, yaş insanın rənglərini solğunlaşdırmır, əksinə onları daha da dolğunlaşdırır.
Əsərlərində niyə məhz yaşlı insanlara üstünlük verdiyinə gəldikdə isə Kəmalə Cəfərova bildirib ki, rəsmini çəkdiyi hər bir şəxs üzərində keçmişdə yaşanmış bir ömür daşıyır, bu isə özlüyündə bir hekayədir: “Buna görə də mənim bütün qəhrəmanlarım artıq özlərində yaşanmış ömürlərini, hekayələrini, öz süjet xətlərini zərrə-zərrə əks etdirirlər”.
Kəmalənin yaratdığı obrazlardan biri də onun babası - tanınmış iş adamı, professor İlham Rəhimovdur. Oğulları ilə birgə sərgiyə qatılan və nəvəsinin rəsmi barədə danışan İ.Rəhimov bildirib ki, Kəmalə gələcəkdə insanları necə görürsə, o cür də kətan üzərinə köçürüb, insanların daxili dünyasını işıqlandırıb.
Onun sözlərinə görə, Kəmalənin rəsmlərinin hər birində bir fəlsəfi yanaşma, baxış mövcuddur. Professor həmçinin nəvəsinin onun barəsində çəkdiyi rəsmi aldığını da diqqətə çatdırıb.
Rəssamın anası Sevinc Rəhimova isə rəsm çəkməyin qızı üçün bir meditasiya olduğunu, əsərlərinin parlaqlıq və rəngarəngliklə diqqət çəkdiyini vurğulayıb.
Sərginin təşkili ilə bağlı təbriklərini çatdıran “Liatris Holding”in rəhbəri, tanınmış iş xanımı Ruhi Əliyeva isə gənc rəssamın bacarıqlarından bəhs edib və onun ilk sərgisinin hələ 6 yaşında olarkən baş tutduğunu bildirib: “Kəmalə 18 il sonra Azərbaycanda belə bir gözəl sərgi təşkil etdi. O, yaşlı insanları çox gözəl əhval-ruhiyyədə, rəngarəng çəkib. Görün onun daxili nə qədər gözəldir, necə zəngin bir övladdır. Mən çox sevinirəm ki, Kəmalə öz üzərində dayanmadan çalışdı və bu səviyyəyə gəlib çıxdı. Ümid edirəm ki, gələcəkdə onun səsi nəinki Azərbaycandan, xarici dövlətlərdən gələcək”.
Rəssam növbəti mərhələdə rəsmlərinin yarmarkalarda sərgilənəcəyini, gələcəkdə daha böyük auditoriyaya çata biləcəyinə ümid etdiyini söyləyib.
Fotolar/Video: Xəyal Vəlizadə
