1xeber.media xəbər verir ki, Macarıstan Rusiyadan enerji idxalından imtina ilə bağlı Avropa İttifaqından kompensasiya tələb etməyə hazırlaşır. Budapeşt bu tələbin Aİ-nin yeni yeddiillik büdcəsində nəzərə alınmasını istəyir.
Məsələ Avropanın Rusiya qazı və neftindən mərhələli şəkildə imtina qərarının yaratdığı iqtisadi nəticələr fonunda gündəmə gəlib. Aİ 2022-ci ildən sonra Rusiya enerji resurslarından asılılığı azaltmağa başlayıb. Hazırda Rusiyanın Aİ qaz idxalındakı payı müharibədən əvvəlki 45 faizdən təxminən 12 faizə düşüb. Rusiya neftinin dəniz yolu ilə idxalı isə demək olar ki, tam dayandırılıb.
Bu siyasətin əsas nəticələrindən biri Avropanın daha bahalı və alternativ enerji mənbələrinə yönəlməsi olub. Xüsusilə son aylarda qlobal enerji bazarında yaranan problemlər fonunda Avropada qazın qiyməti kəskin yüksəlib. Sentyabrın əvvəlində Avropa qazının qiyməti 1 MWh üçün 75 avroya çataraq ötən illə müqayisədə iki dəfədən çox artıb.
Digər tərəfdən, Avropanın qaz anbarlarının doluluq səviyyəsi də ötən illə müqayisədə aşağıdır. Məlumatlara görə, anbarlar hazırda təxminən 67 faiz doludur, halbuki ötən ilin eyni dövründə bu göstərici 80 faizə yaxın idi.
Avropa Auditorlar Məhkəməsi də Aİ-nin Rusiya enerjisindən tam imtina planının risklərlə üzləşdiyini bildirib. Qurumun hesablamalarına görə, keçidi təmin etmək üçün ilkin olaraq təxminən 300 milyard avro investisiya nəzərdə tutulsa da, ölkələr indiyədək bunun yalnız 54,3 milyard avroluq hissəsini öhdələrinə götürüblər.
Beləliklə, Macarıstanın kompensasiya tələbi Aİ daxilində enerji siyasəti ətrafında mübahisələri daha da kəskinləşdirə bilər. Xüsusilə Rusiyanın enerji resurslarından imtinanın qiymətlərə, sənayeyə və Avropanın rəqabət qabiliyyətinə təsiri əsas müzakirə mövzularından birinə çevrilib.
