Xəbər verdiyimiz kimi,Azərbaycan Respublikasının Prezidenti İlham Əliyevin sədrliyi ilə ölkə iqtisadiyyatının strateji sahələrinin inkişafına həsr olunmuş mühüm müşavirə keçirilib.
Dövlət başçısı öz çıxışında Azərbaycanın son illərdə qazandığı iqtisadi müstəqilliyin və sənaye sıçrayışının təməlində dayanan enerji təhlükəsizliyi amilinə xüsusi diqqət çəkib. Prezident ölkənin daxili tələbatının tam ödənilməsi ilə yanaşı, sənayenin fasiləsiz fəaliyyəti üçün güclü bir infrastrukturun qurulduğunu bəyan edib.
Azərbaycanın sənaye müəssisələrinin və regionlarının enerji təminatında heç bir problemin qalmadığını vurğulayan ölkə rəhbəri bildirib:
"Biz elektrik enerjisi ilə bağlı bütün məsələləri həll etdik və çox güclü potensial yaratdıq. Bu gün bizdə ehtiyat generasiya gücləri kifayət qədər böyükdür".
Prezident qeyd edib ki, yaradılan bu nəhəng enerji potensialı təkcə daxili tələbatı və sürətlə böyüyən ağır sənaye sektorunu qidalandırmır, həm də Azərbaycanı regionun və Avropanın mühüm elektrik enerjisi ixracatçısına çevirir. Mövcud ehtiyat generasiya gücləri ölkədə yeni qurulacaq dağ-mədən və metallurgiya müəssisələrinin də heç bir enerji qıtlığı yaşamadan, tam gücü ilə fəaliyyət göstərməsinə rəvac verir.
Müşavirədə həmçinin işğaldan azad edilmiş Qarabağ və Şərqi Zəngəzur iqtisadi rayonlarında bərpaolunan enerji mənbələrinin, o cümlədən su, günəş və külək elektrik stansiyalarının şəbəkəyə qoşulması ilə ölkənin ümumi enerji balansının daha da zənginləşdiyi vurğulanıb. Sonda dövlət başçısı mövcud ehtiyat güclərdən səmərəli istifadə olunması və yaşıl enerji keçidinin sürətləndirilməsi ilə bağlı aidiyyəti qurumlara konkret tapşırıqlar verib.
