1xeber.media xəbər verir ki, ABŞ Prezidenti Donald Tramp Ukrayna Prezidenti Volodimir Zelenski ilə görüşdə Rusiyanın enerji obyektlərinə zərbələrin dayandırılması məsələsini müzakirə edəcək.
Bunu ABŞ dövlət katibi Marko Rubio açıqlayıb. Onun sözlərinə görə, Vaşinqton Ukraynanın Rusiya ərazisindəki enerji infrastrukturuna endirdiyi zərbələrdən ciddi narahatdır.
Rubio həmçinin ABŞ-la əlaqəli neft daşıyan gəmilərə qarşı hücumların da narahatlıq doğurduğunu bildirib. Dövlət katibi bu cür hücumların bir neçə aydır davam etdiyini və ABŞ-ın bunun davam etməsinə imkan verməyəcəyini deyib.
Reuters-in məlumatına görə, Tramp daha əvvəl Zelenskidən Rusiyanın neft emalı zavodlarına hücumları dayandırmağı istəyib. ABŞ prezidentinin bu mövqeyi Rusiya və Ukraynanın enerji sektorlarına zərbələrin dayandırılması ilə bağlı mümkün razılaşma müzakirələri fonunda səslənib.
Hazırda tərəflər arasında enerji obyektlərinə hücumların dayandırılması ilə bağlı mümkün moratorium məsələsi də gündəmdədir.
