1xeber.media xəbər verir ki, Macarıstan Ukrayna və Moldovanın Avropa İttifaqına üzvlüyü ilə bağlı danışıqların texniki mərhələsinə qoyduğu vetonu götürüb.
Məlumata görə, bu qərar Aİ-yə Ukrayna və Moldova ilə danışıqların növbəti mərhələsini razılaşdırmağa imkan verib. Tərəflərin gələn həftə danışıqlar üzrə ümumi mövqelərin layihəsini təsdiqləməsi gözlənilir.
Aİ diplomatı bildirib ki, Brüssel ikinci və üçüncü danışıqlar bloklarının açılması barədə yekdil qərar qəbul etməyə ümid edir. Bunun Ukrayna Ali Radasının oktyabrın 12-də milli azlıqların təhsil hüquqları ilə bağlı qanun layihəsini qəbul etməsindən sonra baş verə biləcəyi qeyd olunur.
Məlumata görə, Macarıstan üçün Ukraynadakı macar azlığının hüquqları uzun müddətdir əsas məsələlərdən biri olaraq qalır. Hazırlanan qanun layihəsinin də Macarıstan rəsmilərinin mövqeyi nəzərə alınmaqla hazırlandığı bildirilir.
İki yeni danışıqlar blokunun açılması ilə Ukraynanın Aİ-yə üzvlük prosesində yalnız iki blokun — yaşıl gündəlik, kənd təsərrüfatı və regional siyasətlə bağlı istiqamətlərin açılmamış qalacağı gözlənilir. Avropa Komissiyası bu məsələlər üzrə də ilin sonuna qədər razılığa gəlməyi planlaşdırır.
