1xeber.media xəbər verir ki, Kiyevin meri Vitali Kliçko şəhərin enerji və kommunal infrastrukturunda yaranan problemlər fonunda sakinlərə müvəqqəti olaraq başqa yerə köçməyi nəzərdən keçirməyi tövsiyə edib.
“Lenta.ru”nun məlumatına görə, Kliçko xüsusilə paytaxtdan kənarda dostları və ya qohumları olan sakinlərə şəhərdən müvəqqəti ayrılmaq variantını nəzərdən keçirməyi məsləhət görüb. Mer yaranmış vəziyyətin daha da ağırlaşa biləcəyini bildirib.
Bununla belə, Kliçko şəhərdə tam təxliyə elan etməyi planlaşdırmadığını qeyd edib. Onun açıqlaması Kiyevdə su təchizatı ilə bağlı problemlərin dərinləşə biləcəyi barədə narahatlıqlar fonunda səsləndirilib.
Ukraynanın baş nazirinin müavini və energetika naziri Denis Şmıqal daha əvvəl Kiyevdə mühüm enerji infrastrukturu obyektinin zədələndiyini açıqlayıb. Bildirilib ki, partlayışlar nəticəsində paytaxtı elektrik enerjisi ilə təmin edən enerji sisteminin bəzi elementləri sıradan çıxıb və şəhərin bir neçə rayonunda elektrik təchizatında fasilələr yaranıb.
Məlumata görə, oktyabrın 7-nə keçən gecə Rusiya Silahlı Qüvvələrinin zərbələri Kiyevdə hərbi və enerji infrastrukturu obyektlərini hədəf alıb. İlkin məlumatlarda Kiyev vilayətinin ən böyük elektrik stansiyası olan Tripolye istilik elektrik stansiyasının da zərər gördüyü bildirilir.
Şəhərdə infrastrukturun vəziyyətinin necə dəyişəcəyi və elektrik enerjisi ilə su təchizatının nə vaxt tam bərpa olunacağı barədə dəqiq məlumat verilməyib.
