1xeber.media xəbər verir ki, ABŞ Prezidenti Donald Tramp noyabrın 3-də keçiriləcək Konqres seçkilərinə qədər İrana yeni hücumlar həyata keçirilməyəcəyini açıqlayıb.
Tramp İranla müharibəyə son qoyulması istiqamətində danışıqların “məhsuldar” getdiyini bildirib. Onun sözlərinə görə, seçkilərdən əvvəl İrana zərbə endirilməsi nəzərdə tutulmur. Bu açıqlama ABŞ-ın yaxın həftələrdə hərbi əməliyyatları yenidən genişləndirə biləcəyi barədə yayılan məlumatlardan sonra səsləndirilib.
Bununla belə, ABŞ Müdafiə Nazirliyinin İrana qarşı mümkün hərbi əməliyyatlar üçün planlar hazırladığı barədə məlumatlar yayılıb. “Axios” nəşrinin yazdığına görə, ABŞ Mərkəzi Komandanlığına İranda genişmiqyaslı hərbi əməliyyatların bərpası ehtimalına hazırlaşmaq tapşırılıb. Bu məlumatlar hücumun mütləq həyata keçiriləcəyi demək deyil.
İranla müharibə ABŞ-da yanacağın qiymətlərinə və Tramp administrasiyasının ictimai dəstəyinə təsir göstərən məsələlərdən birinə çevrilib. Münaqişənin uzanması noyabr seçkilərində Respublikaçılar Partiyasının mövqelərini qorumaq səylərini də çətinləşdirə bilər.
Trampın açıqlamasından sonra beynəlxalq bazarda neft qiymətləri aşağı düşüb. “Reuters”in məlumatına görə, oktyabrın 9-da Bakı vaxtı ilə gün ərzindəki ticarət sessiyasında Brent markalı neftin fyuçersləri 1,61 faiz ucuzlaşaraq bir barel üçün 102,60 dollara, WTI markalı neft isə 1,43 faiz azalaraq 90,18 dollara enib.
